ოდესის ოლქის ადმინისტრაციის ხელმძღვანელის რანგში, მიხეილ სააკაშვილმა ტელეკომპანია BBC-ის პირველი ინტერვიუ მისცა, სადაც განაცხადა, რომ უპირველესად კორუფციასა და დამნაშავეობრივ ჯგუფებთან ბრძოლას აპირებს. მისი თქმით, პრეზიდენტ პეტრო პოროშენკოს ეს ესმის და მისგან წინამორბედების გზით სიარულს არ ელის.
სააკაშვილმა ტელეინტერვიუში აღნიშნა, რომ საწყის ეტაპზე, ის ადგილობრივი ეკონომიკური და კრიმინალური დაჯგუფებებისგან წინააღმდეგობის გაწევას ელოდება, მაგრამ თანდათანობით ყველას მხარდაჭერას მიაღწევს, რაც რეფორმების რეალიზებაში ხელს შეუწყობს.
ჟურნალისტის მიერ დასმულ კითხვას, მისი ,,ხმაურიანი” პერსონის და მის გარშემო ატეხილი პოლემიკის შესახებ, სააკაშვილმა უპასუხა, რომ ნებისმიერი უკმაყოფილება და სკანდალი, რაც მის პოლიტიკურ საქმიანობას უკავშირდება, სწორედ იმ რეფორმებისა და ძირეული ცვლილებების გატარებას ეხება, რასაც საქართველოს ყოფილი პრეზიდენტი და მისი გუნდი კორუმპირებული და კრიმინალური საბჭოთა სტილის დასანგრევად მიმართავდნენ.
,,ეს დახასიათება ოდესის ოლქსაც თავისუფლად ერგება, სადაც ყველა სახის კორუფცია, განსაკუთრებული დამნაშავეობრივი ჯგუფების და უკრაინის ყველა რეგიონის ინტერესი ერთმანეთზეა გადაჯაჭვული. ეს ჩემთვის ძალიან საინტერესო გამოწვევაა. ამ პრობლემებს ვერ დავძლევთ, თუ მკაცრად არ ვიმოქმედებთ, თუ პირდაპირ და გახსნილად არ ვილაპარაკებთ და განსაზღვრულ გამოწვევებს არ მივიღებთ. თუ ჩვენ ვეცდებით, რომ ყველასთვის კარგები ვიყოთ, ასე ვერაფერს მივაღწევთ.” - განაცხადა სააკაშვილმა.
მან იმედი გამოთქვა, რომ არამარტო პრეზიდენტი პოროშენკო, არამედ უკრაინის მთელი ხელისუფლება მიხვდება, რომ ძველებურად ცხოვრება უკვე არ გამოვა.
,,ჩემი დანიშვნით პრეზიდენტმა დაამტკიცა, რომ ის ძალიან უჩვეულო და ძალიან რადიკალური გადაწყვეტილებების მოხმრეა, რაც ბევრისთვის მოულოდნელი იქნება. თქვენ იცოდეთ, აქ ყველაფერი შეიცვლება.”- აღნიშნა მან.
