,,ერთიანი ნაციონალური მოძრაობა” 2014 წელს პრემიებისა და დანამატების სახით გაცემულ თანხებს ასაჯაროებს. მოძრაობის წევრმა ლევან თარხნიშვილმა დღეს გამართულ ბრიფინგზე განაცხადა, რომ გასულ წელს ამ თანხამ სულ 48 მილიონი ლარი შეადგინა.
მისი თქმით, ,,ნაციონალური მოძრაობა" აგრძელებს სამსახურში პრემიებისა და დანამატების მონიტორინგს და იანვარში გაგზავნილი იქნა სადეპუტატო შეკითხვა ყველა სამინისტროში. თუმცა, სამმა სამინისტრომ - იუსტიციის, ეკონომიკისა და მდგრადი განვითარების და შს სამინისტრომ ინფორმაციის გაცემაზე უარი განაცხადა. დანარჩენ 16 სამინისტროს, სადაც თანამშრომელთა რაოდენობა 63 302-ს შეადგენს, პრემიებისა და ყველა სახის დანამატის ოდენობამ 47 982 710 ლარი შეადგინა.
"ლიდერი თანამდებობის პირები არიან განათლების და მეცნიერების მინისტრი თამარ სანიკიძე, რომელსაც ერთ თვეში პრემია 6 550 ლარი აქვს აღებული. იმ თვეში მთლიანად ხელფასთან ერთად სანიკიძემ 12 500 ლარი აიღო. ასევე სასჯელაღსრულების მინისტრის მოადგილედ ყოფნის პერიოდში არჩილ თალაკვაძეს ყოველთვიურად 5 440 ლარის ოდენობის პრემია აქვს მიღებული. ჩვენ არ ვიცით რა რაოდენობის პრემიას იღებს ის შს სამინისტროში, ვინაიდან ტრადიციულად შსს ინფორმაციას მალავს", - განაცხადა თარხნიშვილმა და დასძინა, რომ ჩინოვნიკები მხოლოდ საკუთარ კეთილდღეობაზე ზრუნვით არიან დაკავებული.
