იუსტიციის მინისტრი თეა წულუკიანი ხარაგაულის მუნიციპალიტეტის სოფელ ღორეშაში იმყოფებოდა, სადაც იმერეთის რეგიონიდან ჩამოსულ ახალგაზრდებს შეხვდა. 
უწყების ინფორმაციით, ღონისძიება თემაზე − "ევროპული საქართველო" − ღორეშის საზოგადოებრივ ცენტრში გაიმართა, სადაც შეხვედრის მონაწილეებმა საქართველოს გამოწვევებსა და ქვეყნის ევროინტეგრაციაზე ისაუბრეს.
იუსტიციის მინისტრმა მოზარდებს ინფორმაცია მიაწოდა ადამიანის უფლებების, ევროპული ღირებულებებისა და ფასეულობების, ევროპული და ქართული კანონმდებლობის შესახებ. ამასთან, შეხვედრაზე იუსტიციის სამინისტროს მიერ განხორციელებული რეფორმებისა და სერვისების შესახებაც ისაუბრეს. როგორც მინისტრმა აღნიშნა, ევროპულ სახელმწიფოში მოსახლეობისთვის სერვისები ხელმისაწვდომი უნდა იყოს და მოქალაქეს უნდა უადვილდებოდეს სერვისის მიღება, რის ერთ-ერთი მაგალითიც, მისივე თქმით, ღორეშის საზოგადოებრივი ცენტრია.
შეხვედრა კითხვა-პასუხის რეჟიმში წარიმართა. მოსწავლეებმა თეა წულუკიანს საკუთარი შეხედულებები გაუზიარეს უმცირესობების, ბავშვთა უფლებების, გამოხატვის თავისუფლების და სხვა საინტერესო თემებზე. 
როგორც შეხვედრის დასრულების შემდეგ, იუსტიციის მინისტრმა განაცხადა, სიმბოლურად 1-ელი ივნისიდან დაიწყო ბავშვებთან შეხვედრების ციკლის აქცია.
"ბავშვთა დაცვის დღეს, 1-ელ ივნისს ვიწყებ ქართველ ახალგაზრდებთან შეხვედრას, რათა სახელმწიფო და მინისტრი მათთან იყოს უფრო უშუალო, ახლო და შევძლოთ აზრთა გაცვლა-გამოცვლა იმ საჭირბოროტო საკითხებზე, რომლებიც მოზარდებს შეიძლება აწუხებდეთ − იქნება ეს ევროპული ღირებულებები, მათი მომავალი, უფრო ძლიერი და მტკიცე საქართველო, თუ მისი შენების პროცესი. პირველი შეხვედრა სიმბოლურად 1-ელ ივნისს დავამთხვიეთ. შეხვედრა იყო ქუთაისის, ხარაგაულის, სამტრედიის, ვანის, ბაღდათის, წყალტუბოს, ტყიბულის, ჭიათურის, საჩხერის ბავშვებთან", − აღნიშნა თეა წულუკიანმა.
იმერეთის რეგიონში მცხოვრებ ახალგაზრდებთან შეხვედრა დასაწყისია რაიონებში შეხვედრების ციკლისა − "მინისტრი ესაუბრება ახალგაზრდებს".
იუსტიციის მინისტრი მოზარდებთან შეხვედრებს სხვადასხვა რაიონში გეგმავს.