საქართველოს ექს-პრეზიდენტ მიხეილ სააკაშვილის ოდესის ოლქის გუბერნატორის პოსტზე დანიშვნას, ყირიმის ე. წ. პრეზიდენტმა სერგეი აქსენოვმა ,,უმაღლესი კატეგორიის მარაზმი” უწოდა.
,,მართალია, თავიანთმა თანამდებობის პირებმა უკრაინელებს იმედი გაუცრუეს, მაგრამ შენს ქვეყანაში ხელმძღვანელ პირად სხვა სახელმწიფოდან სუბიექტის ჩამოყვანა, ეს უკვე უმაღლესი კატეგორიის მარაზმია.” - განუცხადა აქსენოვმა რუს ჟურნალისტებს.
მას მიაჩნია, რომ ასე უკრაინის მოქალაქეებს და ოდესის მოსახლეობას უბრალოდ დასცინიან, რადგან სააკაშვილი არ იცნობს მათ მენტალობას, წესებს და არასდროს უცხოვრია ოდესაში.
აქსენოვის თქმით, ის შორეულ პერსპექტივაშიც კი ვერ შეძლებს, ოდესა მთელი შავი ზღვისპირეთის დედაქალაქად აქციოს.
,,მან საქართველოსგან ვერ შექმნა ვერაფერი. მისმა ხელისუფლებამ რამდენიმე კომპლექსი მხოლოდ დედაქალაქში ააშენა და ხუთი მოთამაშე შეუშვა, რომლებიც ქსელური სასტუმროების ბაზარზე მუშაობენ. მაგრამ გაიხედეთ ცოტა გვერდზე და ნახავთ, რაც ხდება საქართველოში. იქ დღეს სწორედ იმას იმკიან, რაც სააკაშვილმა დათესა.” - აცხადებს ყირიმის პრეზიდენტი.
მისი აზრით, ოდესის გუბერნატორად სააკაშვილის დანიშვნა იმის დასტურია, რომ უკრაინის ხელისუფლება საკადრო კრიზისის წინაშე დგას.
შეგახსენებთ, რომ უკრაინის პრეზიდენტმა პეტრო პოროშენკომ, ოდესის ოლქის გუბერნატორის პოსტზე საქართველოს ყოფილი პრეზიდენტი მიხეილ სააკაშვილი ორი დღის წინ წარადგინა და აღნიშნა, რომ რეგიონში ცხოვრების გაუმჯობესებას ის მისგან უკვე ერთ წელიწადში ელოდება.
თავის მხრივ, ახალმა გუბერნატორმა განაცხადა, რომ ოდესას მთელი შავიზღვისპირეთის დედაქალაქად გარდაქმნას უპირებს.
,,ოდესისგან შეიძლება მსოფლიო საოცრება შევქმნათ. მიუხედავად ქვეყანაში არსებული პრობლემებისა, იმის ყველა პირობა არსებობს, რომ ეს საქმე დავიწყოთ.” - აღნიშნა სააკაშვილმა.
მოგვიანებით, მან ჟურნალისტებს განუცხადა, რომ არ აპირებს, თავისი ახალი თანამდებობა უკრაინის პრემიერ-მინისტრის პოსტიკსენ ტრამპლინად გამოიყენოს.
,,როცა მე კარგად დავასრულებ ამ პროექტს ოდესაში... არა, კი არ დავსრულებ, მისი დასრულება შეუძლებელია... როცა ოდესას ,,გავქაჩავ,” მე სიამოვნებით დავბრუნდები უკან, საქართველოში და ჩემს საქმიანობას იქ განვაგრძობ.” - განაცხადა საქართველოს ყოფილმა პრეზიდენტმა.
