იურიდიული დახმარების სამსახურის დირექტორმა, მელიტონ ბენიძემ, 2014 წლის საქმიანობის ანგარიში საქართველოს პარლამენტის პლენარულ სხდომაზე წარადგინა.
მან დეპუატაებს მიაწოდა ინფორმაცია სახელმწიფოს ხარჯზე გაწეული იურიდიული დახმარების, ასევე სამსახურში განხორციელებული ინსტიტუციური რეფორმების შესახებ. განსაკუთრებული ყურადღება გამახვილდა იმ საკანონმდებლო ცვლილებებზე, რომელთა საფუძველზეც, 2014 წელს, იურიდიული დახმარების სამსახური დამოუკიდებელ ორგანიზაციად ჩამოყალიბდა; 2015 წლის 15 აპრილიდან კი, უფასო საადვოკატო მომსახურება გაფართოვდა და, არა მხოლოდ სისხლის სამართლის საქმეები, არამედ გარკვეული კატეგორიის სამოქალაქო და ადმინისტრაციული საქმეებიც მოიცვა.
მელიტონ ბენიძის გამოსვლის შემდეგ, სამსახურის ანგარიში შეაფასეს იურიდიულ საკითხთა კომიტეტის წევრმა, ზაქარია ქუცნაშვილმა, და ადამიანის უფლებათა დაცვის კომიტეტის თავმჯდომარემ, ეკა ბესელიამ. ორივე დეპუტატმა ხაზი გაუსვა იურიდიული დახმარების სამსახურის მნიშვნელობას სოციალურად დაუცველი პირების უფლებათა დაცვის კონტექსტში; მათ დადებითად შეაფასეს სამსახურის საქმიანობა და, სამსახურის ხელმძღვანელს, შემდგომ რეფორმებში, პარლამენტის მხარდაჭერა აღუთქვეს.
იურიდიული დახმარების სამსახური 2007 წელს შეიქმნა და წლების განმავლობაში ჯერ იუსტიციის, შემდეგ კი სასჯელაღსრულების სამინისტროს სისტემაში ფუნქციონირებდა. 2014 წელს სამსახურის სტატუსი შეიცვალა. იგი გამოვიდა აღმასრულებელი ხელისუფლების დაქვემდებარებიდან, დამოუკიდებელ საჯარო სამართლის იურიდიულ პირად ჩამოყალიბდა და ანგარიშვალდებული გახდა მხოლოდ საქართველოს პარლამენტის წინაშე.
