ბანკოკში, გაეროს აზიისა და წყნარი ოკეანეთის სოციალური და ეკონომიკური კომისიის მიერ ორგანიზებულ მაღალი დონის პოლიტიკურ ფორუმში მონაწილეობის ფარგლებში, საქართველოს საგარეო საქმეთა მინისტრის პირველ მოადგილე დავით დონდუა შეხვდა ტუვალუს პრემიერ მინისტრს ენელე სოსენე სოპოაგასა და ვიცე პრემიერს, ფინანსთა და ეკონომიკური განვითარების მინისტრს მაატია ტოაფას.
ტუვალუს პრემიერ მინსტრმა მადლობა გადაუხადა ქართულ მხარეს ა.წ. მარტში ციკლონ პამის მიერ მისი ქვეყნისათვის მიყენებული ზარალის აღმოფხვრაში საქართველოს მიერ გაწეული ჰუმანიტარული დახმარებისთვის. კიდევ ერთხელ დაადასტურა საქართველოს ტერიტორიული მთლიანობისა და სუვერენიტეტისადმი ურყევი მხარდაჭერა.
შეხვედრაზე ისაუბრეს ორ ქვეყანას შორის თანამშრომლობის შემდგომი გაღრმავების საკითხებზე, მიმოიხილეს ცალკეული სფეროები, რომლებშიც ორივე მხარე დაინტერესებულია უფრო აქტიურად ითანამშრომლოს ერთმანეთთან.
ტუვალუს პრემიერ მინისტრმა დაპატიჟა საქართველოს წარმომადგენლები მონაწილეობა მიიღონ მიმდინარე წლის ზაფხულსა და შემოდგომაზე ტუვალუში დაგეგმილ მაღალი დონის ფორუმებში.
