საპარლამენტო უმრავლესობის წევრი ეკა ბესელია აცხადებს, რომ ,,ნაციონალურ მოძრაობაში” მიმდინარე პროცესები არაფრის მომტანია. მისივე შეფასებით, შეუძლებელია ოდესმე ენმ-სა და ,,ოცნებას” შორის რაიმე საერთო ენა გამოინახოს.
,,ჩემთვის პირადად, ეს პოლიტიკური ძალა არის წარსული და ვინ გამოაკლდება ან ვინ შეემატება, ეს ღირებულებითი თვალსაზრისით, არაფრის მომტანი და არც საინტერესო არ არის. მე ის მიკვირს, აქამდეც როგორ შენარჩუნდნენ. იმდენად შეუძლებელია, რომ ჩვენ ერთ ენაზე ოდესმე ვისაუბროთ და რაიმე საერთო არსებობდეს ჩვენს პოლიტიკურ ძალებს შორის, როგორც განსხვავება ცასა და დედამიწას შორის”, - განაცხადა ბესელიამ.
შეგახსენებთ, ზურაბ ჯაფარიძის, გოგა ხაჩიძის, პავლე კუბლაშვილის და გიორგი მელაძის პარტია ერთიანი ნაციონალური მოძრაობიდან გასვლაზე ინფორმაცია დადასტურებულია. ისინი ოფიციალურ განცხადებას აღნიშნულ საკითხზე, 27 მაისისთვის ანონსებენ.
