ჩეჩნეთის რესპუბლიკის უფლებადამცველმა ნურდი ნუხაჯიევმა რუსეთში მრავალცოლიანობის ლეგალიზების იდეას მხარი დაუჭირა.
,,სინამდვილეში მრავალცოლიანობის ინსტიტუტი საზოგადოების წინაშე წამოჭრილი ბევრი ისეთი საკითხის გადაწყვეტის საშუალებაა, როგორიცაა მორალური, სარწმუნოებრივი, დემოგრაფიული, ჰუმანიტარული თუ სხვა სახის პრობლემა. ,,მიწიერი” თვალსაზრისით თუ განვიხილავთ, ეს არის ათასობით ქალის კანონიერი ცოლ-ქმრული ცხოვრება, ათასობით ბავშვი, რომელთაც კანონიერი ბიოლოგიური მამები ეყოლებათ.” - აცხადებს ნუხაჯიევი.
მისი თქმით, რუსეთი კი არის განვითარებული სახელმწიფო, მაგრამ ეს ქვეყნის კანონმდებლობაშიც შესაბამისად უნდა აისახოს, ასევე, უნდა გაძლიერდეს ,,ოჯახის ინსტიტუტი,” განსაკუთრებით მათში, ვინც ისლამს მისდევს.
უფრო ადრე, მრავალცოლიანობის ლეგალიზების იდეით ჩეჩნეთის მეთაურის ადმინისტრაციის ხელმძღვანელი მუჰამედ დაუდოვიც გამოვიდა.
ამ თემის განხილვის მიზეზი, გასულ კვირას გამართული, 57 წლის ჩეჩენი პოლიციელის ნაჯუდ გუჩიგოვისა და 17 წლის ლუიზა-ჰედა გოილაბიევას ქორწილი გახდა.
რუსული მედიის ცნობით, გუჩიგოვს მანამდე ჰყავდა მეუღლე, რომელთანაც ახალ ცოლთან ქორწინების მომენტში ურთიერთობა გაწყვეტილი არ ჰქონია.
რუსეთის კანონმდებლობა კრძალავს ქორწინებას, თუ რომელიმე მხარე სხვა პირთან უკვე იმყოფება კანონიერ ქორწინებაში. თუმცა, მრავალცოლიანობაზე სისხლისსამართლებრივი ან სხვა რაიმე სახის სასჯელი გათვალისწინებული არ არის.
