თბილისის მუნიციპალიტეტის საკრებულოს თავმჯდომარის გიორგი ალიბეგაშვილის და ფრაქცია „ქართული ოცნება-დემოკრატიული საქართველოსთვის“ წევრების ინიციატივით, 2008 წლის აგვისტოს ომის დროს შინდისში, გმირულად დაღუპული 17 ჯარისკაცის მონუმენტის დასასრულებლად საკრებულოს დეპუტატები და აპარატის თანამშრომლები თანხას გადარიცხავენ.
როგორც გიორგი ალიბეგაშვილმა აღნიშნა, სრულიად საქართველოს კათოლიკოს-პატრიარქის ილია II-ის ლოცვა-კურთხევით, შინდისში გმირულად დაღუპული ჯარისკაცების ხსოვნის უკვდავსაყოფად ტაძარი აშენდა და გაიხსნა მემორიალური დაფა. ამ ეტაპზე, მიმდინარეობს მონუმენტზე მუშაობა, რომლის დასრულებაც გარკვეულ თანხებთან არის დაკავშირებული. შესაბამისად, საკრებულოს თავმჯდომარემ იმედი გამოთქვა, რომ აქციას მუნიციპალიტეტის დაქვემდებარებაში მყოფი ყველა უწყება, სახელმწიფო სტრუქტურები და ნებისმიერი მოქალაქე შეუერთდება.
,,აღსანიშნავია ის ფაქტი, რომ მონუმენტის ჟიურის შემადგენლობაში ჩვიდმეტივე დაღუპული ჯარისკაცის ოჯახის წევრი შედიოდა. საბოლოოდ კი ნუგზარ ჭავჭავაძის შემოქმედებითმა პროექტმა გაიმარჯვა. მონუმენტის აგება 2008 წელს დაიწყო და მის დასასრულებლად შეიქმნა შინდისის გმირების სპეციალური ფონდი. მიმაჩნია, რომ ამ მონუმენტით ჩვენს მომავალ თაობას შემოვუნახავთ უკვდავი გმირების სახეს, რისთვისაც საჭიროა ჩავერთოთ აქციაში“- განაცხადა გიორგი ალიბეგაშვილმა.
როგორც საკრებულოს ფრაქცია „ქართული ოცნება-დემოკრატიული საქართველოსთვის“ წევრმა - გენერალმა კობა კობალაძემ აღნიშნა, რომ ჩვენი შთამომავლობისთვის სამაგალითოა ამ ბიჭების გმირობა და მათი სახელის უკვდავსაყოფად ერი და ბერი უნდა გაერთიანდეს.
დღესვე, თბილისის მუნიციპალიტეტის საკრებულოს დიმიტრი ყიფიანის სახელობის დარბაზში ედმონდ მინაშვილის დოკუმეტური ფილმის ჩვენება მოეწყო, რომელიც სოფელ შინდისში მომხდარი ტრაგედიის შესახებ მოგვითხრობს.
შინდისის გმირების ფონდში თანხის გადარიცხვა დაინტერესებულ პირებს ლიბერთი ბანკის შემდეგ ანგარიშზე შეეძლებათ: - GE89LB0115119772084000.
