,, ნაციონალური მოძრაობა” ქვეყანაში აკრედიტებულ საელჩოებსა და არასამთავრობო ორგანიზაციებს მოუწოდებს თავლყური ადევნონ ხელისუფლების ქმედებებს, რომელიც მათი წევრებისა და მხარდამჭერების დაკავებას უკავშირდება. განცხადება ამის შესახებ ,,ნაციონალური მოძრაობის” წევრმა ნუგზარ წიკლაურმა ბათუმში, პარტიის წარმომადგენლების დაკავების გამო გამართულ სპეციალურ ბრიფინგზე გააკეთა.
,,ბათუმში, პრემიერ ირაკლი ღარიბაშვილის ვიზიტის დროს, "ერთიანი ნაციონალური მოძრაობის" წევრები დააკავეს, რომლებიც ნეპოტიზმისა და კორუფციის ფაქტებს აპროტესტებდნენ. ასევე, შეჩერებულ მშენებლობებს. როგორც ჩანს, ხელისუფლება პრობლემების მოგვარების გზად არა მათზე რეაგირებას, არამედ იმ ადამიანების დაკავებას ხედავს, რომლებიც შექმნილ ვითარებას აპროტესტებენ და ამაზე ღიად საუბრობენ. თავისუფალი აზრის დევნამ სისტემატური სახე მიიღო. ჩვენ მოვუწოდებთ ქვეყანაში აკრედიტებულ საელჩოებსა და არასამთავრობო ორგანიზაციებს, თავლყური ადევნონ ამ შემაშფოთებულ პროცესს. ხელისუფლებას, რომელიც პრობლემებს ვერ უმკლავდება, მოქალაქეები ყველგან დახვდებიან და მათი უნიათობის სიმბოლოდ, წითელ ბარათებს აღმართავენ", - განაცხადა წიკლაურმა და ხელისუფლებას დღეს დაკავებული ადამიანების გათავისუფლებისკენ მოუწოდა.
