„იმედის პარტიის“ ლიდერის ირინა სარიშვილის თქმით, ფინანსთა მინისტრი ნოდარ ხადური – „კარიკატურად ქცეული პერსონაჟია და ის თითქოს სპეციალურად არის დატოვებული, რომ ისევ ღლიცინს გადავაყოლოთ ყველაფერი“. ამის შესახებ პოლიტიკოსმა გადაცემა „იმედის კვირაში“ მოქმედი მთავრობის შეფასებისას განაცხადა.
„ეს ხადური კარიკატურად ქცეული პერსონაჟია, ის თითქოს სპეციალურად არის დატოვებული, რომ ისევ ღლიცინს გადავაყოლოთ ყველაფერი, ვილაპარაკოთ ხადური რამდენს ჭამს და რამდენს სვამს და არავინ ხმა არ ამოიღოს, მათ შორის ძალიან მყეფარე ოპოზიციამაც, რომელიც რატომღაც გაჩუმებულია; არ ამოიღოს ხმა იმაზე, რომ მშენებლობები გაჩერდა, ხალხი დარჩა უმუშევარი, გაკოტრებულ კომპანიებს აგებინებენ ტენდერებს, ბიზნესი აღარ არის, ყველა მაღაზია იკეტება. მშიერი ადამიანის მართვა რომ ძალიან ადვილია – ეს ერთი ფასიანი მთავრობის მეპატრონემ ბიძინა ივანიშვილმაც უნდა იცოდეს, რომელმაც ბაზრობის ხმებით ისარგებლა და ეხლა ბაზრობის ხალხი საყვედორუბს: რატომ არ დაგვირიგე მილიარდებიო?!“, – განაცხადა სარიშვილმა და მაყურებელს რჩევა მისცა: „საერთოდ ამის შემდეგ კიდევ თუ გექნებათ მილიარდერთან საქმე, ბიძინა ივანიშვილის მომლოდინეებო,.. კაცი, რომელიც შვიდ და რვა მილიარდს მოაგროვებს და არ თვლის, რომ გარშემო ერთი მეზობელი ან ნათესავი მაინც არ ჰყავს გაჭირვებული იმ პერიოდში, ის კაცი არც თქვენ და არც არავის ფულს არ დაურიგებს. ეს მომავლისთვის, რომ იცოდეთ!“, - აღნიშნა პოლიტიკოსმა.
ამასთანავე სარიშვილმა ხაზი გაუსვა, რომ მოქმედი ხელისუფლება ბევრად უფრო ცუდია, ვიდრე წინა.
„ოღონდ ეს არ ნიშნავს იმას, რომ მე ნაციონალური მოძრაობის მომხრე ვარ“, – დააზუსტა პოლიტიკოსმა.
ირინა სარიშვილმა ასევე შეეხო ირაკლი წერეთლის შიმშილობის თემას.
„ყველა მოღლიცინე ადამიანს, ამ სტუდიაშიც და სტუდიის გარეთაც ვურჩევდი: მხართეძოზე წამოწოლილებს, მე მგონი არ ღირს ირაკლი წერეთლის არცერთ მოთხოვნაზე და არცერთ აქციაზე დაიწყონ ღლიცინი“, - განაცხადა „იმედის პარტიის“ ლიდერმა.
