პარლამენტის იურიდიულ საკითხთა კომიტეტის თავმჯდომარე ვახტანგ ხმალაძე შინაგან საქმეთა სამინისტროში დაგეგმილ რეფორმას ეხმიანება და აცხადებს, რომ თავის დროზე შინაგან საქმეთა სამინისტროსა და სახელმწიფო უსაფრთხოების რაიმენაირი გაერთიანება დაუშვებელი იყო.
ხმალაძის განმარტებით, ამის შესახებ კონსტიტუციაშიც იყო ჩაწერილი, რადგან უსაფრთხოების უზრუნველყოფის თვალსაზრისით, ის სტრუქტურები, რომელთაც აქვთ შეიარაღება და რომლებიც პასუხს აგებენ როგორც საგარეო ასევე საშინაო უსაფრთხოებაზე, ერთ ხელში არ უნდა იყოს კონცენტრირებული.
,,2004 წლამდე ასე იყო. მაშინ, „ნაციონალურმა მოძრაობამ“ შინაგან საქმეთა სამინისტრო და სახლემწიფო უშიშროების სამსახური გააერთიანა. ეს ორი სტრუქტურა ერთი მინისტრის დაქვემდებარებაში აღმოჩნდა. ,,ქართული ოცნების” წინასაარჩევნო პროგრამაში ჩვენ ჩავწერეთ, რომ ეს აუცილებლად უნდა გაიყოს. როგორც იქნა დადგა დრო, როდესაც რეალურად მოხდება ამ ორი სამსახურის ერთმანეთისგან გაყოფა. გაყოფა ხდება იმდაგვარად, რომ სახლემწიფო უსაფრთხოებაზე პასუხისმგებელი უწყება, რომელიც შინაგან საქმეთა სამნისიტროს გამოეყოფა, უკვე აღარ იქნება სამინისტროს დაქვემდებარებაში. მისი ხელმძღვანელი იქნება არა სახლმწიფო პოლიტიკური თანამდებობის პირი, არამედ პროფესიონალი. ხელისუფლების შეცვლა ამ სამსახურის ხელმძღვანელის შეცვლას არ გამოიწვევს. ეს არ უნდა იყოს პოლიტიკური უწყება”,- განაცხადა დეპუტატმა.
საქართველოს მთავრობა დღეს პროკურატურისა და შინაგან საქმეთა რეფორმირების საკითხზე მსჯელობს და კანონპროექტი პარლამენტში ახლო მომავალში გადაიგზავნება.
