EBRD-ი ქარის ელექტროსადგურის მშენებლობას უზრუნველყოფს. ამის შესახებ ენერგეტიკის მინისტრმა კახი კალაძემ გადაცემა ’20 30“-ის ეთერში განაცხადა. კალაძემ აღნიშნა, რომ ასეთი ტიპის ელექტროსადგური პირველად შენდება საქართველოში და პროექტის ღირებულება 30 მილიონს შეადგენს.
„დღეს EBRD-თან ხელი მოვაწერეთ პროექტს: პირველად საქართველოში აშენდება ქარის ელექტროსადგური 20 მეგავატის სიმძლავრის. გორთან ახლოს განთავსდება ეს სადგური, რომელიც 30 მილიონის ღირებულების იქნება. EBRD-ი უზრუნველყოფს ამ პროექტის განხორციელებას“, - განაცხადა კალაძემ და ხაზი გაუსვა, რომ „ეს კიდევ ერთი წინგადადგმული ნაბიჯია ქვეყნის განვითარებისათვის“.
გადაცემის მსვლელობისას ვიცე-პრემიერმა ასევე ისაუბრა სხვა უკვე განხორციელებულ ინვესტიციებზე ენერგეტიკის სფეროში.
„წელს მათ [EBRD-ი] 50 მილიონი გამოყვეს დარიალის ჰეს-ის დასრულებისთვის. ეს პროექტი სექტემბერში შევა ექსპლუატაციაში. ასევე აჭარაში 90 მილიონი გამოუყვეს „ტატა ჯგუფს“, რომელიც ახორციელებს ჰიდროელექტროსადგურების მშენებლობას. ასევე ჯვარი-ხორგას ელექტროგადამცემი ხაზების და ქვესადგურის მშენებლობაზე გამოყოფილი აქვთ 45 მილიონი“, - აღნიშნა კალაძემ.
