ენერგეტიკის მინისტრის კახი კალაძის თქმით, ენერგოტარიფების შესაძლო ზრდა ლარის დევალვაციამ გამოიწვია. ამის შესახებ კალაძემ გადაცემა „20 30“ ეთერში განაცხადა.
„ბოლო კვირეების განმავლობაში კითხვები ისმის ტარიფის ზრდასთან დაკავშირებით. ამას ერთადერთი მიზეზი აქვს: ეს გამოიწვია ლარის დევალვაციამ, რადგან ელექტროენერგიის იმპორტის დროს (800 მილიონი კვტ/სთ, რომელსაც ყიდულობს საქართველო) ანგარიშსწორება ხდება დოლარში და მოსახლეობისგან ამ თანხას ვიღებთ ლარში“, - განმარტა კალაძემ.
მინისტრმა ასევე აღნიშნა, რომ ლარის გაუფასურებამ დიდი ზიანი მიაყენა ენერგეტიკის სფეროს. ჟურნალისტის კითხვაზე „ტარიფი გაიზრდება თუ არა?“ კალაძემ უპასუხა:
„მე გამიჭირდება ამაზე პასუხის გაცემა, სანამ არ გვექნება სრული სურათი მარეგულირებელი კომისიიდან, სანამ დეტალურად არ იქნება დათვლილი კომპანიების მიერ შეტანილი განაცხადი. მინდა ავღნიშნო ერთი რამ: იმ შემთხვევაშიც კი, თუ გარდაუვალი იქნება და ჩვენ ტარიფის აწევა მოგვიწევს, მთავრობაში იმსჯელებენ ამ საკითხზე. მე არ გამოვრიცხავ, რომ ბიუჯეტიდან მოხდეს სუბსიდირება იმისათვის, რომ მოსახლეობას ტარიფი არ გაუძვირდეს“.
