რუსეთის საგარეო საქმეთა მინისტრის მოადგილის გრიგორი კარასინის განცხადებით, ზურაბ აბაშიძესთან ერთად, საქართველოსა და რუსეთის უმაღლეს ლიდერებს შორის მაღალი დონის კონტაქტებისთვის შესაბამისი ნიადაგის მოსამზადებლად მუშაობს.
„პერსპექტივა ყოველთვის არსებობს, მაგრამ იმისთვის, რომ პერსპექტივა რეალობად იქცეს, მუშაობაა საჭირო. ჩვენ კვლავაც მივიჩნევთ, რომ მაღალი და მით უმეტეს, უმაღლესი დონის კონტაქტები კეთილსინდისიერად უნდა მომზადდეს, რადგან მოუმზადებელ კონტაქტებს ყოველთვის არ მოაქვს ღირებული შედეგები. ჩემი აზრით, ჩვენს ქართველ პარტნიორებს ეს კარგად ესმით. სწორედ უფრო მაღალი დონის კონტაქტებისთვის შესაბამისი ნიადაგის მოსამზადებლად ვმუშაობთ მე და ზურაბ აბაშიძე ორივე ქვეყნის ხელმძღვანელების სახელით“, - განაცხადა კარასინმა.
რაც შეეხება რუსეთთან ურთიერთობების საკითხებში საქართველოს პრემიერ-მინისტრის სპეციალურ წარმომადგენლს ზურაბ აბაშიძეს, მან ჟურნალისტებტან განაცხადა, რომ რუსეთისა და საქართველოს ხელისუფლებების პირველი პირების შეხვედრის მოსამზადებლად, არანაირი პრაქტიკული მუშაობა ამჟამად არ მიმდინარეობს. მისივე თქმით, ზოგადად ასეთი შეხვედრები, საგარეო უწყებების პრეროგატივაა.
შეგახსენებთ, გრიგორი კარასინი და საქართველოს პრემიერ-მინისტრის სპეციალური წარმომადგენელი რუსეთთან ურთიერთობების საკითხებში ზურაბ აბაშიძე მორიგ შეხვედრას პრაღაში, ივნისის შუა რიცხვებში გეგმავენ.
