კოალიცია ,,ქართული ოცნების” წევრი თამარ კორძაია ფრაქცია ,,ქართულ ოცნებას” ტოვებს. შესაბამისი განცხადებით დეპუტატმა ბიუროს უკვე მიმართა და აღნიშნულ საკითხს სწორედ ბიუროს დღევანდელ სხდომაზე განიხილავენ.
შეგახსენებთ, რომ კორძაია მერვე მოწვევის პარალამენტის დეპუტატია. თამარ კორძაია დაიბადა 1977 წლის 18 ივლისს სოხუმში. 1994-1999 წლებში სწავლობდა თბილისის გრიგოლ რობაქიძის სახელობის უნივერსიტეტის ჟურნალისტიკის ფაკულტეტზე, 2003 წელს კი წარჩინებით დაამთავრა ივანე ჯავახიშვილის სახელობის თბილისის სახელმწიფო უნივერსიტეტის სოხუმის ფილიალის იურიდიული ფაკულტეტი. სამართლის სხვადასხვა სფეროში კვალიფიკაციის ამაღლების კურსები გაიარა საქართველოში (2005), უკრაინაში (2006), დიდ ბრიტანეთში (2008) და აშშ-ში (2008,2010).
თამარ კორძაია 2003 წლიდან 2012 წლამდე მუშაობდა საქართველოს ახალგაზრდა იურისტთა ასოციაციაში, სადაც მედიის და ინფორმაციის თავისუფლების პროექტებს ხელმძღვანელობდა. ბოლო ერთი წლის მანძილზე იგი იყო საქართველოს ჟურნალისტური ეთიკის ქარტიის აღმასრულებელი დირექტორი.
თამარ კორძაია იყო საქართველოს ახალგაზრდა იურისტთა ასოციაციის გამგეობის წევრი 2008 წლიდან 2013 წლამდე. მან წარმატებით ჩააბარა ადვოკატთა ასოციაციის წევრი. 2006 წელს იყო დევნილთა მიმართ სახელმწიფო სტრატეგიის შემმუშავებელი იურიდიული ჯგუფის წევრი.
ბოლო 10 წლის მანძილზე თამარი უამრავ ადგილობრივ და საერთაშორისო პროექტში იყო ჩართული როგორც მედია ექსპერტი. მას ათობით ტრენინგი აქვს ჩატარებული მედიისა და ინფორმაციის თავისუფლების, მაუწყებლობის რეგულირებისა და ჟურნალისტური ეთიკის საკითხებზე. იგი არის მრავალი კვლევის ავტორი და თანაავტორი ამ სფეროებში.
თამარი 2003-2004 წლებში ლექციებს კითხულობდა ადმინისტრაციულ სამართალში თბილისის სახელმწიფო უნივერსიტეტში.
