საპარლამენტო უმცირესობის წევრის გიორგი გაბაშვილის აზრით, ხელისუფლება შეგნებულად აძლიერებს პრორუსულ ძალებს საქართველოში. ეს განცხადება გააკეთა „ნაციონალური მოძრაობის“ ლიდერმა გადაცემა „არჩევანში“. ტელეგადაცემის მსვლელობისას განიხილებოდა NDI-ის კვლევის შედეგები, რომლის თანახმადაც ბოლო წლის განმავლობაში გაორმაგდა იმ რესპონდენტების რაოდენობა, ვისთვისაც მისაღებია ევრაზიულ კავშირში გაწევრიანება.
„მე ეს აბსოლუტურად არ მიკვირს“, - აღნიშნა გაბაშვილმა და დაამატა:
„ამ ხელისუფლებამ დაიწყო იმით, რომ ჯაშუშური ქსელების წარმომადგენლები პოლიტპატიმრების სტატუსით გამოუშვა [ციხიდან]. ჩვენ ამ ხელისუფლების დროს ვნახეთ სტალინის ბიუსტების დაბრუნება, ჩვენ ვნახეთ კარის გახსნა აბსოლუტურად ყველა რუსული პროპაგანდის მანქანისათვის. ზედიზედ იმართება კონფერენციები, სადაც ჩამოდიან პირდაპირ ანტიქართული, საქართველოს დესუვერენიზაციის და დაშლის მომხრე ექსპერტები. რა გგონიათ, ეს წითელი დროშები, გეორგიევსკის ლენტები?.. ეს ყველაფერი არის ორგანიზებული, ამაში ჩართულია რუსეთის საელჩო. ივანიშვილი არც არასოდეს არ მალავდა, რომ ის წარმოადგენს რუსეთისათვის ხელსაყრელ პარტნიორს.“
გამოსვლის ბოლოს საპარლამენტო უმცირესობის წევრმა დასძინა: „ხელისუფლება შეგნებულად აძლიერებს პრორუსულ ძალებს საქართველოში“.