პრეზიდენტმა გიორგი მარგველაშვილმა ევროპული საბჭოს პრეზიდენტი დონალდ ტუსკი საქართველოში მოიწვია. საქართველოს მიღწევების სანახავად სტუმრობა, მარგველაშვილმა დონალდ ტუსკს, შეხვედრის შემდეგ გამართულ პრესკონფერენციაზეც სთხოვა და თანხმობისთვის მადლობა გადაუხადა.
,,ჩემთვის ძალიან დიდი პატივია, ჩემი მეგობარი მოვიწვიო საქართველოში. ბატონო დონალდ, გელოდებით თბილისში და არა მხოლოდ თბილისში, რათა განახოთ და გაგიზიაროთ განვითარების ის პროგრესი, რომელსაც ჩვენმა ქვეყანამ მიაღწია. მოხარული ვარ, რომ მიიღეთ ეს მოწვევა. ჩვენთვის დიდი პატივი იქნება გიმასპინძლოთ როგორც თბილისში, ისე ბათუმში. ველი თქვენს ვიზიტს, რომელიც, ჩემი რწმენით, დამატებით პოზიტიურ ემოციებს შემატებს საქართველოში მიმდინარე პროცესებს და გააღრმავებს ჩვენს ურთიერთობებს", - მიმართა მარგველაშვილმა ტუსკს.
შეხვედრაზე განხილულ საკითხებთან დაკავშირებით კი, მარგველაშვილმა განაცხადა, რომ საუბარი საქართველოს აქტიურ ევროპულ დღის წესრიგს შეეხო.
"ყოველთვის ფრიად სასიამოვნოა მეგობრებთან შეხვედრა. ჩემთვის ძალიან მნიშვნელოვანი იყო ინტენსიური დიალოგის გამართვა ბატონ ტუსკთან. ჩვენ განვიხილეთ საქართველოს აქტიური ევროპული დღის წესრიგი. დღის წესრიგი მართლაც ინტენსიურია და ეს გახლავთ ჩვენი ეროვნული განვითარებისთვის უმთავრესი პრიორიტეტი. ჩვენ ძალზედ აქტიური პოზიციები გვეკავა ასოცირების შესახებ ხელშეკრულების გაფორმებამდეც და აქტიურ დიალოგს ვაწარმოებდით ჩვენს ევროპელ კოლეგებთან, რამაც უზრუნველყო შემდგომი განვითარება, რეფორმები, პოზიტიური დღის წესრიგი საქართველოსთვის. ამჟამად უფრო სპეციფიურ დისკუსიებში შევედით, რომელმაც საქართველო წინ უნდა წასწიოს ვიზალიბერალიზაციის პროცესში. დარწმუნებული ვარ, აღნიშნული დიალოგი დადებითად აისახება ქვეყნის განვითარებაზე. პარტნიორობის ის დონე, რომელიც ჩვენ გაგვაჩნია ევროპელ პარტნიორებთან და მეგობრებთან, საქართველოში აღიქმება, როგორც პოზიტიური მოძრაობა თავისი ისტორიული არჩევანისა და ადგილისკენ - ევროპული ოჯახისკენ. ეს ძალზედ მნიშვნელოვანია ქართველი ხალხისთვის", - აღნიშნა საქართველოს პრეზიდენტმა.
გიორგი მარგველაშვილის თქმით, საუბარი რეგიონში მიმდინარე პოლიტიკურ და ეკონომიკურ პროცესებსაც შეეხო.
