საქართველოს საგარეო საქმეთა მინისტრის თამარ ბერუჩაშვილის შეფასებით, პრეზიდენტ გიორგი მარგველაშვილის ბრიუსელში ვიზიტი იყო ძალიან მნიშვნელოვანი რიგის სამიტის წინ. მისი თქმით, პრეზიდენტს ჰქონდა საშუალება მაღალი ტრიბუნიდან ესაუბრა საქართველოს მოლოდინებზე რიგის სამიტის დეკლარაციასთან დაკავშირებით.
"პრეზიდენტს ჰქონდა საშუალება, ევროპარლამენტის საგარეო ურთიერთობათა კომიტეტის სხდომაზე გამოსულიყო და ძალიან მკაფიოდ, კიდევ ერთხელ დაედასტურებინა ჩვენი ევროპელი პარტნიორებისთვის საქართველოს ევროპული არჩევანის ურყევობა, ამასთან ერთად, ესაუბრა იმ მასშტაბურ რეფორმებზე, რომელსაც საქართველო ევროპული დღის წესრიგის მიხედვით ახორციელებს და ჩვენს მოლოდინებზე, რომ ევროპული არჩევანი, ვიზალიბერალიზაციისკენ გადადგმული კონკრეტული ნაბიჯები აისახოს რიგის სამიტის დეკლარაციაში.
ჩვენ გვქონდა ძალიან კარგი შესაძლებლობა საქართველოს ევროპულ არჩევანზე, ზოგადად საქართველოში მიმდინარე რეფორმებზე გვესაუბრა სპეციალურ კონფერეციაზე, რომელიც ქართველი, უკრაინელი და მოლდოველი სტუდენტების ინციატივით და ბრიუსელში ჩვენი მისიის ხელშეწყობით მოეწყო ევროპარლამენტში. ეს იყო ძალიან მაღალი დონის დისკუსია და აქაც დღის წესრიგში იყო რიგის სამიტის და მოლოდინები",-განაცხადა მინისტრმა.
მისივე თქმით, პარტნიორებისა და საქართველოს მხრიდან აღინიშნა, რომ რიგა არის ძალიან მნიშვნელოვანი ეტაპი, მაგრამ საქართველოს ევროპული სვლა და რეფორმები გრძელდება.
