გახდება თუ არა საქართველო ნატოს წევრი, ეს მხოლოდ საქართველოსა და 28 მოკავშირე ქვეყნის გადასაწყვეტია, - ამის შესახებ ნატოს გენერალურმა მდივანმა იენს სტოლტენბერგმა საქართველოს პრეზიდენტ გიორგი მარგველაშვილთან შეხვედრის შემდეგ გამართულ პრესკონფერენციაზე განაცხადა. აქვე მან დასძინა, რომ სხვა არცერთი ქვეყნის საქმე არ არის, რამენაირად ჩაერიოს ამ პროცესში.
,,საქართველო წარმოადგენს ნატოს მყარ და მტკიცე პარტნიორს და ჩვენ მივესალმებით იმ თანამშრომლობას, რომელსაც უკვე რამდენიმე წელია ვახორციელებთ. ჩვენ მხარს ვუჭერთ საქართველოში მიმდინარე რეფორმების პროცესს და ხაზს ვუსვამთ ნებისმიერი ქვეყნის ფუნდამენტურ ღირებულებებს, თვითონ გადაწყვიტოს და თვითონ აირჩიოს რომელ გზას დაადგება. აქ იგულისხმება უსაფრთხოების მექანიზმებიც ანუ სამხედრო ალიანსის წევრობა, რომელსაც ესა თუ ის ქვეყანა მოისურვებს. საქართველო გახდება თუ არა ნატოს წევრი, ეს მხოლოდ საქართველოსა და 28 მოკავშირე ქვეყნის გადასაწყვეტია და არც ერთი სხვა ქვეყნის საქმე არ არის ვეტო გამოიყენოს ან სხვა რამენაირად ჩაერიოს ამ პროცესში", - განაცხადა ნატოს გენერალურმა მდივანმა და დასძინა, რომ საქართველო ალიანსში ინტეგრაციის გზაზე პროგრესს აღწევს.
