თავდაცვის მინისტრის თინა ხიდაშელის განცხადებით, რუსეთი უბრალოდ იმითიც გაღიზიანებულია, რომ საქართველო არსებობს. ამის შესახებ მინისტრმა ვაზიანის სამხედრო აეროდრომზე ქართულ-ამერიკული ერთობლივი სწავლების გახსნის ცერემონიის შემდეგ განაცხადა კითხვაზე - ხომ არ გამოიწვევს ეს მასშტაბური წვრთნები რუსეთის გაღიზიანებას.
„რუსეთი გაღიზიანებულია იმით, რომ საქართველო საერთოდ არსებობს, ამიტომ ეს ფურცელი მე მგონი საერთოდ უნდა დავხუროთ. ეს უკვე მოცემულობაა. გავიგეთ, რომ მნიშვნელობა არ აქვს. მე და თქვენ ახლა ამ ენაზე რომ ვმეტყველებთ, რომელზედაც ვმეტყველებთ, ეს უკვე საკმარისი საფუძველია. ჩვენთვის ძალიან მნიშვნელოვანი დღეა და არ არის მისი გაფუჭება საჭირო სხვა თემებზე ფიქრით,“ - განაცხადა თინა ხიდაშელმა.
მისივე თქმით, პირველი შემთხვევაა, როდესაც ასეთი მასშტაბური წვრთნებია საქართველოში და ამდენი ამერიკელი სამხედრო იმყოფება საქართველოს ტერიტორიაზე. მინისტრის ინფორმაციით, წლის ბოლომდე კიდევ რამდენიმე წვრთნაა დაგეგმილი, მათ შორის ზაფხულში იქნება ნატო-საქართველოს წვრთნები.
,,ჩვენ არავისთან ომს არ გვეგმავთ. ჩვენ ვემზადებით მშვიდობისთვის და ზუსტად ამიტომ გვჭირდება ეს სიძლიერე და სიმყარე ქართუილ ჯარში,“ - დასძინა თავდაცვის მინისტრმა.
ქართულ-ამერიკული ერთობლივი სწავლება - „ღირსეული პარტნიორი“ დღეს, ვაზიანში ოფიციალურად გაიხსნა. თავდაცვის სამინისტროს ინფორმაციით, წვრთნა საქართველოში პირველად ტარდება და ქართული ასეულის ნატო-ს სწრაფი რეაგირების ძალებთან დაახლოებას, ასევე, ნატო-ს მომავალ ოპერაციებსა და წვრთნებში მონაწილეობისთვის მზადყოფნის ამაღლებას ისახავს მიზნად.
