შინაგან საქმეთა სამინისტროს საზოგადოებასთან ურთიერთობის სამსახურის ყოფილი უფროსი გურამ დონაძე აცხადებს, რომ ბუტა რობაქიძეს იარაღი არც გარდაცვალებამდე ჰქონდა და არც გარდაცვალების შემდეგ. მისივე თქმით, საქმეში არც წინა და არც ახლანდელ გამოძიებაში არსად არ წერია, რომ რობაქიძეს ედო იარაღი.
ბუტა რობაქიძის საქმეზე სასამართლო პროცესის დასრულების შემდეგ, დონაძემ ჟურნალისტებთან განაცხადა, რომ ძალიან უნდა სიმართლის გარკვევა.
„მთელი ამ ხნის განმავლობაში მოწმეები აცხადებდნენ, რომ ამირან (ბუტა) რობაქიძეს ედო იარაღი. დღეს დავსვი სასამართლო სხდომაზე საკითხი - სად დევს ეს საქმეში? საქმეში არც წინა და არც ახლანდელ გამოძიებაში არსად არ წერია, რომ რობაქიძეს ედო იარაღი გარდაცვალებამდე ან გარდაცვალების შემდეგ. ძალიან გთხოვთ, რომ საზოგადოებას ერთხელ და სამუდამოდ უთხარით სიმართლე თქვენ მაინც, რომ ამირან (ბუტა) რობაქიძეს იარაღი არ ჰქონია. ამას მეც ვადასტურებ. ამირან რობაქიძეზე ვამბობ, სხვაზე არაფერს ვამბობ. ამას სასამართლო და გამოკვლევები დაადგენს - ვის რა ჰქონდა,“ - განაცხადა გურამ დონაძემ.
დღევანდელ პროცესზე ბუტა რობაქიძის მეგობარი აკაკი ბართაია დაკითხეს, რომელიც სპეცოპერაციის დროს რობაქიძესთან ერთად ავტომანქანაში იმყოფებოდა.
მთავარი პროკურატურა ბუტა რობაქიძის საქმესთან დაკავშირებით, გურამ დონაძეს და შსს–ს ხუთ ყოფილ მაღალჩინოსანს სამსახურებრივი უფლებამოსილების ბოროტად გამოყენებას ედავება, დაზარალებულის პირადი ღირსების შელახვით. დონაძესთან ერთად, საქმეში ბრალდებულნი არიან - ზურაბ მიქაძე, დავით იაშვილი, ირაკლი ფირცხალავა, ალექსანდრე გვაზავა და ზაზა ბაქრაძე.
აღნიშნულ საქმეზე შემდეგი სასამართლო სხდომა 29 მაისს 16:00 საათზე ჩაინიშნა.
