იუსტიციის მინისტრი თეა წულუკიანი საპარლამენტო უმცირესობის წევრს გიორგი ვაშაძეს, იუსტიციის სახლში აღმოჩენილი ხარვეზების აღმოფხვრის მენეჯერად დანიშვნას სთავაზობს. ამის შესახებ მან კომიტეტების გაერთიანებულ სხდომაზე გიორგი ვაშაძის საპასუხოდ განაცხადა.
წულუკიანის განცხადებით, იუსტიციის სახლების მშენებლობის პროცესში წინა ხელისუფლების დროს დაშვებული ხარვეზების გამოსწორებას 3,5 მილიონი ლარი სჭირდება.
„მესმის, რომ ბატონი ვაშაძისთვის დღესაც არის რომაული ქალღმერთი იუსტიცია და მუზა. მუზა კი არის მისთვის იუსტიცია, მაგრამ მისი სსიპ-ის ყოფილი ბრენდი შევცვალე, იმიტომ, რომ მათ მოპარული ბრენდი ჰქონდათ. ეს ბრენდი უნდა შეცვლილიყო. არ არის ჩემი სტილი, რომ „დავგუგლო“, ბრენდი მოვიპარო და გამოვაცხადო, რომ ეს დიდი პროგრესია“, - განმარტა იუსტიციის მინისტრმა.
მისივე თქმით, მარტო თბილისის იუსტიციის სახლის სახურავიდან, ალპინისტების მეშვეობით, 15 ტონა სამშენებლო ნაგვისა და რკინის ჩამოტანა 40 ათასი ლარი დაჯდა.
„რაკი ის იუსტიციაზე რჩება მიბმული, მზად ვარ, ჩემს სისტემაში დავასაქმო. მის მიერ აშენებული ყველა ინფრასტრუქტურა პრობლემურია. ვპატიჟებ მას, რომ მოვიდეს. შემიძლია დავასაქმო კიდეც მრჩევლად და იუსტიციის სახლში აღმოჩენილი ხარვეზების აღმოფხვრის მენეჯერად დავნიშნო. 3.5 მლნ-ზე მეტი მჭირდება ბიუჯეტიდან, რათა მის მიერ დატოვებული ხარვეზები გამოვასწორო, რადგან ერთი ქარი რომ დაუბერავს, სახურავი არ ჩამოიქცეს და მოქალაქე არ მოკლას“, - აღნიშნა თეა წულუკიანმა და აქვე დასძინა, რომ ეს პრობლემა აღმოფხვრილია, თუმცა სხვა პრობლემებიც არსებობს.
საპარლამენტო უმცირესობამ, კომიტეტების გაერთიანებული სხდომა, დროის სიმცირის გამო, პროტესტის ნიშნად დატოვა.
