საქართველოში ვიზიტად მყოფი ამერიკელი კონგრესმენები სამთავრობო ცვლილებების პროცესს დადებითად აფასებენ.
,,უნიკალური რამ მოხდა. "რესპუბლიკელებმა" და "დემოკრატებმა", ყველამ ერთხმად, დაუჭირეს მხარი საქართველოს", - განაცხადა ჟურნალისტებთან ჯოუ ვილსონმა, პარლამენტის თავმჯდომარესთან შეხვედრის შემდეგ.
მისივე თქმით, ამერიკა მხარს უჭერს საქართველოს მისწრაფებებს და შეეცდება, მხარი დაუჭიროს ქვეყნის ინტერესებს რიგაში.
,,საქართველო დგამს ნაბიჯებს ევროატლანტიკურ სტრუქტურებთან დასაახლოებლად, მათ შორის გამოვყოფდი გასულ წელს ევროკავშირთან ასოცირების შეთანხმების ხელმოწერას. ამერიკა თქვენ მხარს გიჭერთ თქვენს მისწრაფებებში და შევეცდებით, მხარი დავუჭიროთ საქართველოს და საქართველოს ინტერესებს რიგაში",-აღნიშნა კონგრესმენმა. მან ხაზგასმით ისაუბრა ქართველი სამხედროების პროფესიონალიზმზე და მზადყოფნაზე.
,,ჩემი ორი უფროსი ვაჟი მსახურეობდა ქართველ სამხედროებთან ერთად ერაყში, ხოლო ჩემს უმცროს ვაჟს ჰქონდა შესაძლებლობა, ინჟინრის პოზიციაზე ეთანამშრომლა ქართველ სამხედროებთან ავღანეთში. ძალზე მნიშვნელოვანია ქართველი სამხედროების პროფესიონალიზმის ამაღლებისთვის ის ფაქტი, რომ საწრთვნელი ბაზა იქნება შექმნილი საქართველოში”, - აღნიშნა სტუმარმა, რომელიც კონგრესში შეიარაღებული ძალების საქმეთა კომიტეტში, პოტენციური საფრთხეების საქმეთა ქვეკომიტეტს ხელმძღვანელობს.
