შინაგან საქმეთა მინისტრის ვახტანგ გომელაურის განცხადებით, დაგეგმილია სამინისტროს სისტემის გაყოფა - ცალკე უწყებად დარჩება შინაგან საქმეთა სამინისტრო და შეიქმნება სახელმწიფო უსაფრთხოების სამსახური.
როგორც მან პარლამენტის კომიტეტების გაერთიანებულ სხდომაზე განმარტა, პოლიციის ძირითად ფუნქციად დანაშაულის თავიდან აცილება და აღკვეთა დარჩება, სახელმწიფო უსაფრთხოების სამსახურის ფუნქცია კი სახელმწიფო უსაფრთხოების წინააღმდეგ მიმართული საფრთხეების შესახებ ინფორმაციის მოგროვება, დამუშავება და სპეციკური დანაშაულის წინააღმდეგ ბრძოლა იქნება.
„აღნიშნული რეფორმის შემდეგად, უზრუნველყოფილი იქნება სისტემის ფარგლებში მოქცეული ჭარბი ძალაუფლების დეკონცენტრაცია, რაც დადებითად აისახება ადამიანის უფლებათა ეფექტიანობაზე“, - აღნიშნა გომელაურმა.
მინისტრი განმარტავს, რომ სახელმწიფო უსაფრთხოების სამსახური იქნება საქართველოს მთავრობის უშუალო დაქვემდებარებაში მყოფი აღმასრულებელი ხელისუფლების სპეციალური დანიშნულების დაწესებულება; სამსახურის უფროსის კანდიდატურას მთავრობას შესთავაზებს პრემიერ-მინისტრი, მოწონების შემთხვევაში კი, კანდიდატურა წარედგინაბა პარლამენტს, რომელიც მას სრული შემადგენლობის უმრავლესობით, 6 წლის ვადით აირჩევს.
