ევროპის კვირეულის ფარგლებში, საქართველოს პარლამენტი ევროპის დღისადმი მიძღვნილ ღონისძიებას უმასპინძლებს.
პარლამენტის ინფორმაციით, სტუმრებს, რომელთა შორის არიან აღმასრულებელი და საკანონმდებლო ხელისუფლების, საქართველოში აკრედიტებული დიპლომატიური კორპუსის, საერთაშორისო და ადგილობრივი ორგანიზაციების წარმომადგენლები, სიტყვით მიმართავენ საქართველოს პარლამენტის თავმჯდომარე დავით უსუფაშვილი, ევროკავშირის ელჩი საქართველოში იანოშ ჰერმანი და გაეროს ელჩი საქართველოში ნილს სკოტი.
ღონისძიების ფარგლებში დაგეგმილია ოთხი სოციალური ვიდეორგოლის პრეზენტაცია, რომელთა მიზანია ევროკავშირთან ასოცირების შესახებ შეთანხმებისა და თავისუფალი ვაჭრობის შესახებ ღრმა და ყოვლისმომცველი ხელშეკრულების თაობაზე ინფორმაციის გავრცელება.
ამავე ღონისძიების ფარგლებში გაიმართება ახალგაზრდული ფოტო კონკურსის - “ჩემი ევროპა“ გამარჯვებულთა დაჯილდოებაც.
ევროპის დღისადმი მიძღვნილი ღონისძიების ორგანიზატორია საქართველოს პარლამენტი, ევროკავშირისა და გაეროს განვითარების პროგრამის (UNDP) ხელშეწყობით. ღონისძიება ხვალ, 6 მაისს, 13:00 საათზე, ეროვნული ბიბლიოთეკის საგამოფენო დარბაზში (გუდიაშვილის ქ. N7, თბილისი) გაიმართება.
