არავის აქვს პასუხი კითხვაზე - როდის გახდება საქართველო ევროკავშირის წევრი, რადგან ეს საკითხი ჯერ არ წამოჭრილა. ამის შესახებ, ევროკავშირის წარმომადგენლობის ხელმძღვანელმა საქართველოში იანოშ ჰერმანმა ილიას სახელმწიფო უნივერსიტეტში, სიტყვით გამოსვლისას განაცხადა.
"არ მაქვს პასუხი ამ კითხვაზე და ვფიქრობ, არც არავის აქვს ალბათ, ვინაიდან ჯერ არ წამოჭრილა ეს საკითხი. ამ კითხვაზე ვერ გიპასუხებთ არა იმიტომ, რომ ევროკავშირის კარგად დისციპლინებული საჯარო მოხელე ვარ, არამედ იმიტომ, რომ ეს ჯერ ჰიპოთეტური საკითხია. თქვენ გაქვთ ევროკავშირთან ასოცირების შეთანხმება და რაც უფრო წინ წაიწევთ ამ მიმართულებით, მით უფრო მეტი უფლება გექნებათ ამ შეკითხვის დასმის",- განაცხადა ელჩმა.
ევროპის კვირეულის ფარგლებში, ევროკავშირის წარმომადგენლების ხელმძღვანელმა ლექცია წაიკითხა თემაზე - ევროკავშირისა და საქართველოს ურთიერთანამაშრომლობა.
