ვინ იქნება ,,ქართული ოცნებიდან” საგარეჯოს მაჟორიტარი დეპუტატობის კანდიდატი ჯერ არ არის ცნობილი, ეს არჩევნების წინა პერიოდში გაირკვევა. ამის შესახებ, ,,ჯი-ეიჩ-ენთან” საუბარში პარლამენტის წესებისა და საპროცედურო საკითხთა კომიტეტის თავმჯდომარემ გიორგი კახიანმა განაცხადა.
მისი განმარტებით, ხვალ, 4 მაისს პარლამენტის წესებისა და საპროცედურო საკითხთა კომიტეტში დეპუტატები გიგლა აგულაშვილისა და თინა ხიდაშელისთვის პარლამენტის წევრის უფლებამოსილების ვადამდე შეწყვეტის საკითხის განიხილავენ.
,,გიგლა აგულაშვილი პროპორციული სიით არჩეული დეპუტატია, შესაბამისად მისი ადგილმონაცვლე ბლოკ ,,ქართული ოცნების” სიაში მომდევნო ,,რესპუბლიკელი” კანდიდატი თემურ ნერგაძე იქნება. თუმცა ხვალ ამ საკითხზე არ ვიმსჯელებთ, განვხილავთ მხოლოდ თინა ხიდაშელისა და გიგლა აგულაშვილისთვის უფლებამოსილების შეწყვეტის საკითხს, რადგან მათ დაკავებული აქვთ პარლამენტის წევრის სტატუსთან შეუთავსებელი თანამდებობა. მას შემდეგ, რაც მათ უფლებამოსილება შეუწყდებათ, განიხილება ადგილმონაცვლის საკითხი. თინა ხიდაშელი რადგან არის მაჟორიტარული სიით მოხვედრილი პარლამენტის წევრი, მიმდინარე წლის ოქტომბერში საგარეჯოში შუალედური არჩენები ჩატარდება”, _განაცხადა კახიანმა.
რაც შეეხება მაჟორიტარი დეპუტატობის კანდიდატს, კახიანი აცხადებს, რომ ჯერჯერობით უცნობია ვინ იქნება კოალიცია ,,ქართული ოცნებიდან” გურჯაანში მაჟორიტარობის კანდიდატი.
,,ქართული ოცნებიდან” ვინ იქნება ჩვენი კანდიდატი ჯერ არ არის ცნობილი და ეს არჩევნების წინა პერიოდში გაირკვევა”, - აღნიშნა კახიანმა.
კომიტეტის სხდომა, თბილისში არსებულ პარლამენტის შენობაში ხვალ, 14.00 საათზეა ჩანიშნული. შეგახსენებთ, რომ დეპუტატები თინა ხიდაშელი და გიგლა აგულაშვილი თავდაცვისა და გარემოს დაცვის მინისტრად დაინიშნენ.
