თავდაცვის, გარემოს დაცვისა და სპორტისა და ახალგაზრდობის საქმეთა მინისტრების ყველა მოადგილეს უფლებამოსილება შეუწყდათ.
აღნიშნული ბრძანებები პრემიერ-მინისტრმა ირაკლი ღარიბაშვილმა გამოსცა. დოკუმენტები პირველი მაისითაა დათარიღებული და მთავრობის ადმინისტრაციის ვებ-გვერდზეა გამოქვეყნებული.
პრემიერის ბრძანებების თანახმად, მინისტრების მოადგილეებს უფლებამოსილება „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის 23-ე მუხლის მეორე პუნქტის საფუძველზე შეუწყდათ.
ირაკლი ღარიბაშვილმა მინისტრთა კაბინეტის ახალი შემადგენლობა დღეს წარადგინა. მთავრობის განახლებულ შემადგენლობაში სამი ახალი მინისტრი იქნება.
მთავრობის მეთაურმა გარემოს დაცვის მინისტრის პოსტზე გიგლა აგულაშვილის, თავდაცვის მინისტრად თინა ხიდაშელის, ხოლო სპორტისა და ახალგაზრდობის საქმეთა მინისტრად ტარიელ ხეჩიკაშვილის დანიშვნის შესახებ ბრძანებები უკვე გამოსცა.
კანონმდებლობის თანახმად, საქართველოს პარლამენტმა მთავრობის განახლებული შემადგენლობა პრეზიდენტის წარდგინების შემდეგ უნდა დაამტკიცოს, თუმცა ქვეყნის მეთაურმა აღნიშნული პროცესი ერთი კვირით გადადო.
