საქართველოს ფინანსთა მინისატრის მოვალეობის შემსრულებელი ნოდარ ხადურის აცხადებს, რომ პრემიერს მინისტრების შესაცვლელად არავისთან შეთანხმება არ სჭირდება.
,,არამხოლოდ ძველი მინისტრები, არამედ ახალდანიშნული მინისტრებიც უფლებამოსილნი არიან, რომ დაიწყონ მუშაობა და ჩვენ ჩვეულ რეჟიმში ვმუშაობთ. საქართველოს პრემიერმინისტრის ექსკლუზიური უფლებაა, კონსტიტუციით დადგენილი პროცედურებით შეცვალოს ნებისმიერი მინისტრი, არავისთან ამის შეთანხმება არ სჭირდება,”- განაცხადა ნოდარ ხადურმა.
შეგახსენებთ, პრემიერმა ირაკლი ღარიბაშვილმა დღეს მთავრობის ახალი შემადგენლობა დაასახელა და პრეზიდენტს სთხოვა მინისტრობის კანდიდატები პარლამენტისთვის დღესვე წარედგინა. პრეზიდენტმა გიორგი მარგველაშვილმა მთავრობის ახალ შემადგენლობაზე ხელმოწერა ერთი კვირით გადადო და მმართველ გუნდს მოუწოდა მთავრობის შემადგენლობაზე მსჯელობა მშვიდ გარემოში გააგრძელონ. მოგვიანებით, პრემიერ მინისტრმა ირაკლი ღარიბაშვილმა თავდაცვის, სპორტისა და ახალგაზრდობის საქმეთა და გარემოს დაცვის მინისტრების დანიშვნის შესახებ ბრძანებები გამოსცა.
