ექსპერტი უსაფრთხოების საკითხებში ხათუნა ლაგაზიძე მიიჩნევს, რომ საქართველოს ხელისუფლებამ აზერბაიჯანისთვის ექსპრეზიდენტ მიხეილ სააკაშვილის გადმოცემის მოთხოვნით თავი საერთაშორისო იზოლაციაში მოიქცია.
ლაგაზიძე ,,ჯი-ეიჩ-ენთან” საუბარში აცხადებს, რომ ის ადამიანი რომელმაც მსგავსი გადაწყვეტილება მიიღო სამსახურიდან გასათავისუფლებელია.
,,დღევანდელი ხელისუფლება ფაქტობრივად, საერთაშორისო იზოლაციაშია. რას ვგულისხმობ, როცა ვსაუბრობ საერთაშორისო იზოლაციაზე? _ ხელისუფლების ცვლილების ფონზე გამოგვრჩა მთავარი თემა, რაც აზერბაიჯანში მოხდა. კერძოდ, საქართველოში სამართალდამცავი ორგანოების მიერ ძებნილი პირი სააკაშვილი, როცა აზერბაიჯანის პრეზიდენტმა მიიღო და ამის აფიშირება საერთაშორისო მასშტაბით მოხდა. Mმე პირადად, გავთავისუფლებდი სამსახურიდან იმ ადამიანს ვინც მიიღო გადაწყვეტილება აზერბაიჯანისთვის სააკაშვილის გადმოცემის მოხოვნით მიემართა, რადგან წინასწარვე ცნობილი იყო, რომ აზერბაიჯანი სააკაშვილს საქართველოს არ გადმოსცემდა და შედეგად, მივიღეთ საქართველოს ხელისუფლების სრული იგნორირება აზერბაიჯანის ხელისუფლების მხრიდან. კიდევ ერთი თავზე ლაფის დასხმა. Uუკრაინის ხელისუფლება ხომ იგნორირებას უკეთებს საქართველოს ხელისუფლებას და მაინც და მაინც უნდოდათ აზერებაიჯანის ხელისუფლებას ასე პირდაპირ, გამომწვევად თავს ლაფი დაესხა საქართველოს ხელისუფლებისთვის, ამას ისახავდა მიზნად ვინც ეს გააკეთა? ამ ფონზე საქართველოს ხელისუფლება საკუთარ მოსახლეობასთან მაინც რომ ცდილობდეს საერთო ენის გამონახვას, აბსოლუტურად გაუაზრებელ სამთავრობო ცვლილებებს ახორციელებენ”, - განაცხადა ლაგაზიძემ ,,ჯი-ეიჩ-ენთან” საუბარში.
შეგახსენებთ, მთავარი პროკურორის მოადგილე ირაკლი შოთაზე ადასტურებს, რომ აზერბაიჯანის პროკურატურაში გაგზავნილია მოთხოვნა ექსპრეზიდენტ მიხეილ სააკაშვილის დაკავებისა და ექსტრადირების შესახებ, თუმცა ქართულ მხარეს ოფიციალური პასუხი ჯერ არ მიუღია.
