პრემიერ-მინისტრი ირაკლი ღარიბაშვილი გარემოს დაცვის მინისტრის ელგუჯა ხოკრიშვილის შემცვლელს უახლოეს დღეებში დაასახელებს. რაც შეეხება თავად ხოკრიშვილს, პრემიერის თქმით, ის კომპეტენტური, კვალიფიციური და უწესიერესი ადამიანია.
"ბატონი ელგუჯა არის ძალიან კომპეტენტური, კვალიფიციური და უწესიერესი ადამიანი. მართლა გული დამწყდა, რომ ვეღარ შეძლო მუშაობის გაგრძელება, მაგრამ ჰქონდა საპატიოს მიზეზი, მისი ოჯახი გერმანიაში ცხოვრობს. ვინაიდან ოჯახი ჩემთვისაც ძალიან ძვირფასია, ვეღარ გავუწიე წინააღმდეგობა. მინდა, ბატონ ელგუჯას გაწეული საქმიანობისთვის მადლობა გადავუხადო და წარმატებები ვუსურვო. რაც შეეხება ახალ მინისტრს, მას უახლოეს დღეებში დავასახელებ”, -აცხადებს პრემიერი.
მისივე თქმით, ბიძინა გიორგობიანის კანდიდატურა არ განიხილება გარემოს დაცვის მინისტრის პოსტზე.
შეგახსენებთ, რომ გარემოსა და ბუნებრივი რესურსების დაცვის მინისტრის პოსტი უკვე ვაკანტურია. საქართველოს პრემიერ–მინისტრმა ირაკლი ღარიბაშვილმა გარემოსა და ბუნებრივი რესურსების დაცვის მინისტრის ელგუჯა ხოკრიშვილის თხოვნა ,თანამდებობიდან გადადგომასთან დაკავშირებით, რამდენიმე საათში დააკმაყოფილა.
გავრცელებული ინფორმაციით, გარემოსა და ბუნებრივი რესურსების დაცვის მინისტრად ბიძინა გიორგობიანი მოიაზრება.
