უახლოესი ათწლეულის განმავლობაში ევროკავშირის გაფართოება არ იგეგმება, თუმცა მასში შესვლის მსურველ ქვეყნებთან მოლაპარაკებები გაგრძელდება.ამის შესახებ ევროკომისიის კომისარმა იოჰანეს ჰანმა ბერლინში გამართულ აღმოსავლეთის ფორუმზე განაცხადა.
,,უახლოეს 10 წელიწადში ევროკავშირში მიღება არ იქნება, მაგრამ ეს იმას არ ნიშნავს, რომ ჩვენ მოლაპარაკებებს არ ვაწარმოებთ.” - აღნიშნა ჰანმა.
ის მიიჩნევს, რომ გადაწყვეტილების მიღებამდე კანდიდატი ქვეყნები ეკონომიკური თვალსაზრისით ,,უფრო უნდა დაუახლოვდნენ ევროპას.”
ევროკომისრის თქმით, ევროკავშირის ქვეყნების უმეტესობას ალიანსის გაფართოების სურვილი ამ დრომდე არ გამოუთქვამს.
,,ჩვენ მიზანმიმართულად უნდა ვიმოქმედოთ, რათა ყველამ გაიგოს, რომ ახალი წევრი ევროპისთვის ძალიან ღირებული იქნება და არა - დამატებითი გადასახადების ობიექტი.” - განაცხადა ჰანმა.
ევროკომისიის წარმომადგენელმა იმედი გამოთქვა, რომ მომავალში ევროკავშირის ახალი წევრი სერბეთი გახდება.
