23 აპრილს, თბილისში, საგარეო საქმეთა სამინისტროში გაიმართება აშშ-საქართველოს სტრატეგიული პარტნიორობის ქარტიის ფარგლებში უსაფრთხოებისა და თავდაცვის სამუშაო ჯგუფის მორიგი შეხვედრა. როგორც საგარეო უწყების პრესსპიკერმა დავით კერესელიძემ განაცხადა ქართული მხრიდან შეხვედრას უხელმძღვანელებენ საგარეო საქმეთა მინისტრის პირველი მოადგილე დავით დონდუა და თავდაცვის მინისტრის მოადგილე ლევან ღირსიაშვილი, ხოლო შეერთებული შტატების მხრიდან კი აშშ-ის სახელმწიფო მდივნის თანაშემწის პირველი მოადგილე ტოდ ჩეპმენი და აშშ-ის თავდაცვის მდივნის თანაშემწის მოადგილე ეველინ ფარკასი.
,,შეხვედრაზე მხარეები განიხილავენ საქართველოსა და აშშ-ს ორმხრივ თანამშრომლობას უსაფრთხოებისა და თავდაცვის მიმართულებებით, ასევე მიმოიხილავენ რეგიონული და მრავალმხრივი უსაფრთხოების საკითხებს. განსაკუთრებული ყურადღება დაეთმობა რეგიონში არსებული გამოწვევების, საქართველოს თავდაცვითი შესაძლებლობების განმტკიცებისა და საქართველოს ნატოში ინტეგრაციის საკითხებს, ასევე სხვადასხვა მიმართულებებით არსებულ მნიშვნელოვან გამოწვევებზე საერთო მიდგომების შემუშავებას”, _განაცხადა ჟურნალისტებთან კერესელიძემ.
