,,თავისუფალი დემოკრატების” ლიდერმა, ირაკლი ალასანიამ, სპეციალურ ბრიფინგზე საფრანგეთში ხელმოწერილ ჰაერსაწინააღმდეგო თავდაცვის მემორანდუმსა და ე.წ. კაბელების საქმის კავშირზე ილაპარაკა.როგორც ალასანიამ განაცხადა თავდაცვის სამინისტროს 5 თანამშრომელი იმ იმედით დააკავეს, რომ ის დოკუმენტზე ხელს არ მოაწერდა.
,,წინასწარ როგორც ვიყავით მთავრობასთან შეთანხმებული მემორანდუმს ხელი მოვაწერე და ექვსი თვის განმავლობაში ველოდებოდი სწორედ შეთანხმებით გათვალისწინებული პუნქტების რეალიზაციას. სამწუხაროდ, ეს არ მოხდა. იმ მომენტში როდესაც უარი ვთქვი არასწორ, უკანონო მითითებას დავმორჩილებულიყავი მეორე დღეს დილით როდესაც მივდიოდი მემორანდუმის ხელმოსაწერად დაკავებული იქნა თავდაცვის სამინისტროს 5 თანამშრომელი, იმ იმედით რომ უარს ვიტყოდი ჩემს სწორ განზრახვაზე. მე ვთქვი და გავიმეორებ, ისინი კარგად არ მიცნობენ, მე ყოველთვის ვიდექი და ვიდგები სახელმწიფო ინტერესების დაცვის საქმეში. არასდროს არ მქონია არც არჩევანის გაკეთების ფუფუნება, არც უფლება და არც სურვილი, მორალურ კომპრომისსა და სწორ გზას შორის. სწორედ ამიტომ მე მოვაწერე ხელი ამ მემორანდუმს. თბილისში როცა ჩამოვედი და ვიკითხე რატომ მოხდა თავდაცვის სამინისტროს თანამშრომლების დაკავება, ამაზე პასუხი არ მიმიღია და მას დაემატა ისიც, რომ "პროკურატურამ თავხედურად გააგრძელა ჩვენს პარტიასა და ჩემზე, როგორც პარტიის ლიდერზე, პოლიტიკური ნიშნით შემოტევა”, _აღნიშნა ალასანიამ.
ირაკლი ალასანიას განცხადებით, დოკუმენტის ხელისმოწერა პრემიერ-მინისტრთან და უსაფრთხოების კაბინეტის წევრებთან შეთანხმებული იყო. მიუხედავად ამისა, მას დაურეკეს პრემიერის სახელით, რომ მემორანდუმზე ხელი არ მოეწერა.
