პორტუგალიის რესპუბლიკის ნაციონალურმა ასამბლეამ ევროკავშირსა და საქართველოს შორის ასოცირების შესახებ შეთანხმების რატიფიკაცია მოახდინა.
დოკუმენტი პარლამენტში ხმათა უმრავლესობით მიიღეს.
საქართველოს საგარეო უწყების ინფორმაციით, სარატიფიკაციო დოკუმენტი ძალაში შევა მას შემდეგ რაც, შესაბამის ბრძანებულებას ხელს მოაწერს პორტუგალიის რესპუბლიკის პრეზიდენტი.
"პორტუგალია არის საქართველოს მეგობარი და მხარდამჭერი ქვეყანა. ბოლო რამდენიმე თვის განმალობაში პორტუგალიამ გააკეთა არაერთი მხარდამჭერი განცხადება, მათ შორის დაგმო რუსეთის ფედერაციასა და საოკუპაციო რეჟიმებს შორის გაფორმებული ე.წ. "ხელშეკრულებები". პორტუგალია მხარს უჭერს საქართველოს სვლას ევროპისკენ, ევროატლანტიკური მისწრაფებისკენ"- განაცხადა პორტუგალიის რესპუბლიკაში საქართველოს ელჩმა გიორგი გორგილაძემ.
შეგახსენებთ, რომ საქართველომ ევროკავშირთან ასოცირების ხელშეკრულებას ხელი 27 ივნისს მოაწერა. ხელშეკრულებას ევროკავშირის მხრიდან ხელი ევროკომისიის პრეზიდენტმა ჟოზე მანუელ ბაროზომ და ევროკავშირის საბჭოს პრეზიდენტმა ჰერმან ვან რომპეიმ მოაწერეს.
ხოლო საქართველოს მხრიდან კი პრემიერ-მინისტრმა ირაკლი ღარიბაშვილმა.
პროცედურის მიხედვით, ევროკავშირთან საქართველოს ასოცირების ხელშეკრულების რატიფიცირება ევროკავშირის 28 სახელმწიფომ უნდა მოახდინოს.
საქართველოსა და ევროკავშირს შორის მოლაპარაკებები ასოცირების შესახებ შეთანხმებაზე ოფიციალურად დაიწყო 2010 წლის ივლისში (ხოლო ღრმა და ყოვლისმომცველი თავისუფალი სავაჭრო სივრცის კომპონენტზე- 2011 წლის დეკემბერში).
მოლაპარაკებების პროცესში გაიმართა 14 პლენარული სესია შეთანხმების პოლიტიკურ ნაწილზე, 6 რაუნდი - ღრმა და ყოვლისმომცველ თავისუფალ სავაჭრო სივრცეზე და 100-მდე ვიდეო-კონფერენცია დარგობრივი თანამშრომლობის თავებსა და DC FTA-ზე. მოლაპარაკებები დასრულდა 2013 წლის ივლისში. ასოცირების შესახებ შეთანხმება 1000-მდე გვერდს მოიცავს და ითვალისწინებს საქართველოს კანონმდებლობის დაახლოებას ევროკავშირის 300-მდე სამართლებრივ აქტთან.
