პრეზიდენტის, გიორგი მარგველაშვილის პარლამენტში ყოველწლიურ მოხსენებაზე მუშაობა დასრულდა. როგორც ჟურნალისტებთან პრეზიდენტის საპარლამენტო მდივანმა, გიორგი კვერენჩხილაძემ განაცხადა მოხსენებასთან დაკავშირებული ძირითადი საკითხები გარკვეულწილად გაიარეს სამოქალაქო სექტორის, საექსპერტო და შესაბამისი პროფესიული წრეების წარმომადგენლებთან.
"პრეზიდენტის ყოველწლიური მოხსენების მომზადება, რომელიც კონსტიტუციის შესაბამისად, ქვეყნის მდგომარეობის უმნიშვნელოვანეს საკითხებს ეხება, დასრულდა. მოხსენებაში განხილულ იქნება საგარეო და უშიშროების პოლიტიკასთან, ეკონომიკურ პრობლემებთან დაკავშირებული საკითხები. ასევე თავდაცვისა და შეირაღებული ძალების მდგომარეობა და პრობლემური თემები, ინსტიტუციური თემატიკა - ინსტიტუტების გაძლიერების, დემოკრატიული ფასეულობების, ადამიანის უფლებების, სხვადასხვა ინსტიტუციური რეფორმის და სხვა საკითხები"-აღნიშნა პრეზიდენტის საპარლამენტო მდივანმა.
შეგახსენებთ, რომ 31 მარტს, 13:00 საათზე, პრეზიდენტი პარლამენტის წინაშე ყოველწლიური მოხსენებით წარსდგება.