დოკუმენტთა ჩამონათვალი, რომელიც უცხოელებს საქართველოს ვიზის მისაღებად მოეთხოვებათ, კანონით განსაზღვრული აღარ იქნება, თუმცა ამასთან განისაზღვრა გარემოებები, რომელთა დადასტურება აუცილებელია საქართველოს ვიზის მისაღებად ან/და დოკუმენტები, რომლებიც უნდა დაერთოს სავიზო განაცხადს განისაზღვრება საქართველოს მთავრობის დადგენილებით. აღნიშნულს მთავრობის ინიციატივით ,,უცხოელთა და მოქალაქეობის არმქონე პირთა სამართლებრივი მდგომარეობის შესახებ“ კანონში დაგეგმილი ცვლილებები ითვალისწინებს.
კანონის ამოქმედების დღიდან (2014 წლის 1 სექტემბერი) დღემდე არსებული საქართველოს ვიზების გაცემის პრაქტიკის გათვალისწინებით, ზოგიერთი კატეგორიის ვიზის გაცემისათვის შესაძლოა ვერ იქნას წარმოდგენილი კანონით განსაზღვრული კონკრეტული სახის დოკუმენტი, ხოლო კანონის მოქმედი რედაქცია არ ითვალისწინებს რაიმე სახის გამონაკლისის დაშვების შესაძლებლობას.
ამდენად, საქართველოს ვიზების გაცემის პროცედურის გამარტივებისა და ვიზების გაცემისათვის წარმოსადგენი დოკუმენტების ადეკვატურად განსაზღვრისათვის, კანონპროექტი ითვალისწინებს კანონიდან დოკუმენტების ჩამონათვალის ამოღებას, თუმცა ამასთან განსაზღვრავს, რომ გარემოებები, რომელთა დადასტურება აუცილებელია საქართველოს ვიზის მისაღებად ან/და დოკუმენტები, რომლებიც უნდა დაერთოს სავიზო განაცხადს განისაზღვრება საქართველოს მთავრობის დადგენილებით. აღნიშნული ლოგიკიდან გამომდინარე, კანონიდან ამოღებული იქნა გასაუბრებაზე დასაზუსტებელი საკითხების ჩამონათვალი, ასევე არასრულწლოვანი და ფსიქიკური აშლილობის მქონე პირისთვის საქართველოს ვიზის გაცემის შემთხვევაში მისი კანონიერი წარმომადგენლის თანხმობის საჭიროების შესახებ ჩანაწერი, რომლებიც დადგინდება საქართველოს მთავრობის დადგენილებით.
