,,ნაცმოძრაობის” წევრი მიხეილ მაჭავარიანი პრემიერ ირაკლი ღარიბაშვილს საქართველოს კონსტიტუციის 52-ე მუხლის წაიკითხვისკენ მოუწოდებს, სადაც როგორც დეპუტატი განმარტავს მითითებულია დეპუტატის უფლებები.
”საქართველოს უნიათო პრემიერს, რომელიც არ აკეთებს საქმეს და ქვეყანა ყოველდღიურად უკან მიდის, შევახსენებ კონსტიტუციას, სადაც 52-ე მუხლში შავით თეთრზე წერია, რომ საქართველოს პარლამენტის წევრს აქვს უფლება, ჩვენება არ მისცეს იმ ფაქტის გამო, რომელიც მას გაანდეს, როგორც პარლამენტის წევრს. დაუშვებელია ამ საკითხთან დაკავშირებით წერილობითი მასალის დაყადაღება. ეს უფლება პარლამენტის წევრს უნარჩუნდება მისი უფლებამოსილების შეწყვეტის შემდეგ,” - აცხადებს მიხეილ მაჭავარიანი.
შეგახსენებთ, რომ გუშინ პრემიერი ირაკლი ღარიბაშვილი პატრულის თანამშრომლის მიერ მოპოვებული ინფორმაციის პარლამენტის წევრის გივი თარგამაძისთვის მიწოდებას გამოეხმაურა და შინაგან საქმეთა სამინისტროს, აღნიშნული ფაქტის გამოძიებისკენ მოუწოდა.
“ჩემთვის გახდა ცნობილი, რომ გენერალურმა ინსპექციამ გაათავისუფლა პატრულის ერთ-ერთი თანამშრომელი, რომელიც სრულიად უკანონოდ და ფარულად აწვდიდა ინფორმაციას პარლამენტის წევრ გივი თარგამაძეს. მინდა მივმართო საქართველოს მთავარ პროკურატურას, რომ დაუყონებლივ დაიწყონ აღნიშნული ფაქტის შესწავლა და გამოძიება და თუ გამოიკვეთება დანაშაულის ნიშნები, დროულად მოახდინონ რეაგირება კანონის შესაბამისად. ეს არის ყოვლად დაუშვებელი ფაქტი. ვინც არ უნდა იყოს ის, იქნება ის პარლამენტის თუ მთავრობის წევრი, ნებისმიერი მაღალი თუ უმაღლესი თანამდებობის პირი, დღეს საქართველოში არავინ დგას კანონზე მაღლა. იქნება ეს პარლამენტის წევრი, ამ შემთხვევაში თარგამაძე, მან უნდა აგოს პასუხი სრული სიმკაცრით, ვინაიდან ეს არის შეურაცხმყოფელი პოლიციისთვის,”-განაცხადა ირაკლი ღარიბაშვილმა.
