საქართველოს პრემიერ-მინისტრი ირაკლი ღარიბაშვილი პროკურატურას მიმართავს, რომელსაც „ჯი-ეიჩ-ენი“ გთავაზობთ უცვლელად:
„მე მინდა საგანგებო განცხადება გავაკეთო. ჩემთვის გახდა ცნობილი, რომ დღეს გენინსპექციამ გაათავისუფლა 1 თანამშრომელი, რომელიც ფარულად, უნებართვოდ აწვდიდა ინფორმაციას დეპუტატ გივი თარგამაძეს. მივმართავ პროკურატურას, რომ დაუყონებლივ დაიწყონ აღნიშნული საკითხის გამოძიება, თუ გამოიკვეთა დანაშაულის ნიშნები, დროულად მოახდინონ რეაგირება კანონის შესაბამისად. ეს არის დაუშვებელი ფაქტი, ვინც არ უნდა იყოს ეს, იქნება ეს მთავრობის წევრი, მაღალი თანამდებობის პირი თუ სხვა. დღეს საქართველოში არავინ არ დგას კანონის მაღლა",-განაცხადა ღარიბაშვილმა.
შსს-ს გენერალური ინსპექციის მიერ ჩატარებული სამსახურებრივი შემოწმების შედეგად დადგენილია იმ თანამშრომლის ვინაობა, რომელიც შსს-ს ბაზაში არსებულ დაცულ ინფორმაციას "ნაციონალური მოძრაობის" წევრ გივი თარგამაძეს სისტემატურად აწვდიდა,-ამის შესახებ შსს-ში გამართულ ბრიფინგზე გახდა ცნობილი.
გამოძიებით დადგინდა, რომ საპატრულო პოლიციის თანამშრომელი რუსლან ბაზიაშვილი თავისი კუთვნილი გენერირების მოწყობილობა „დიჯიპასი“-ს მეშვეობით სამინისტროს დაცულ კომპიუტერულ ბაზაში შევიდა, მოქალაქე რამაზ დევაძის შესახებ ინფორმაცია არასამსახურებრივად მოიძია და საზღვრის კვეთის ამსახველი ფოტომასალა გივი თარგამაძეს მიაწოდა. შემდგომ აღნიშნული ინფორმაცია ერთ-ერთმა ტელეკომპანიამ საკუთარი ეთერისთვის გამოიყენა. ასევე დადგინდა, რომ რუსლან ბაზიაშვილმა გივი თარგამაძეს შსს-ს დაცული ინფორმაცია სხვადასხვა პერიოდში არაერთხელ გადასცა.
"გენერალური ინსპექციის დასკვნის საფუძველზე, რუსლან ბაზიაშვილი სამსახურიდან დათხოვნილია. ასევე გვსურს გაცნობოთ, რომ პროკურატურამ დაიწყო გამოძიება ქალაქ თბილისში, ოქროყანის გზაზე, 2015 წლის 26 იანვარს პატრულ-ინსპექტორებსა და მოქალაქეებს შორის მომხდარ ინციდენტთან დაკავშირებით. ვინაიდან გამოძიების პროცესში გამოიკვეთა საპატრულო პოლიციის თანამშრომლების მხრიდან სამსახურებრივი უფლებამოსილების გადამეტების და განზრახ უკანონო დაკავების შესაძლო ფაქტები, სისხლის სამართლის საქმის მასალებზე დაყრდნობით, შსს-ს გენერალურმა ინსპექციამ მოკვლევა ჩაატარა.
გენერალური ინსპექციის დასკვნის საფუძველზე, პატრულ-ინსპექტორ არჩილ დავითულიანს და ნიკა ალიხანაშვილს გამოძიების დასრულებამდე უფლებამოსილება შეუჩერდათ",- განაცხადეს სამინისტროში.
ამასთან, გენერალური ინსპექციამ შსს-ს ბაზაში დაცული ინფორმაციის გაცემის ფაქტზე, სამინისტროს რიგებიდან 9 თანამშრომელი სამსახურიდან გაათავისუფლა.
