პარლამენტის ბიუროს სხდომაზე 18 მარტის პლენარული სხდომის დღის წესრიგის საკითხებზე იმსჯელეს.
პლენარული სხდომის განმავლობაში დეპუტატები 100-მდე საკითხს განიხილავენ.
მიმდინარე პლანერული სხდომების კვირაში პარლამენტი საქართველოს კანონის პროექტს„პატიმრობის კოდექსში ცვლილების შეტანის შესახებ“ და თანმდევ კანონპროექტებს პირველი მოსმენით უყრის კენჭს.
დეპუტატები მესამე მოსმენით განიხილავენ კანონპროექტებს „არბიტრაჟის შესახებ“ საქართველოს კანონში ცვლილების შეტანის თაობაზე,
კანონმდებლები განიხილავენ „საქართველოს სამოქალაქო კოდექსში ცვლილების შეტანის შესახებ“კანონპროექტს, თანმდევი კანონპროექტებით,რომელიც ქმედუუნარობის ინსტიტუტის (გარდა ასაკთან მიმართებით ქმედუუნარობისა) არსებითად ცვლილებას უკავშირდება. მასთან დაკავშირებული რეგულაციები საქართველოს საკონსტიტუციო სასამართლოს გადაწყვეტილებასთან შესაბამისობაში მოდის.
ბიუროს სხდომაზე იმსჯელეს ახალი საკანონმდებლო ინიციატივების შესახებაც. დღევანდელი პლენარული სხდომის დღის წესრიგში შეტანილია საკითხი საყდრისი-ყაჩაღიანის საბადოსთან დაკავშირებული მოვლენების შემსწავლელი დროებითი საგამოძიებო კომისიის შექმნის მიზანშეწონილობის შესახებ, რომელიც საპარლამენტო უმცირესობაში შემავალი ფრაქციების ინიციატივას წარმოადგენს.
დეპუტატები განიხილავენ საკითხს საქართველოს პარლამენტის წევრის, გიორგი ოჩიაურისთვის პარლამენტის წევრის უფლებამოსილების ვადამდე შეწყვეტის თაობაზე, ასევე, საქართველოს პარლამენტის გამოკლებული წევრის დავით საყვარელიძის ადგილმონაცვლის, ეკატერინე ხერხეულიძის პარლამენტის წევრის უფლებამოსილების ცნობის შესახებ.
დღესვე, პლენარულ სხდომაზე განიხილება საპარლამენტო ფრაქცია „თავისუფალი დემოკრატების“ მოთხოვნა პროკურატურის საქმიანობის საპარლამენტო კონტროლის ფარგლებში პლენარულ სხდომაზე საქართველოს მთავარი პროკურორის ინფორმაციის მოსმენის თაობაზე.
პლენარული სხდომა 13:00 საათზე დაიწყება.
