„გაერთიანებული დემოკრატიული მოძრაობის“ ლიდერის ნინო ბურჯანაძის განცხადებით, ჩვენი ხელისუფლების წარმომადგენლები იმასაც ვერ ხვდებიან, რომ „ნაციონალურ მოძრაობას“ არეულობა აწყობს და აქედან გამომდინარე, ის, დღესდღეობით სრულ პასუხისმგებლობას „ქართულ ოცნებას“ აკისრებს იმის გამო, რომ ხელისუფლება აბსოლუტურად უუნაროა და მან ვერ შეძლო ელემენტარულად ისე წაეყვანა პოლიტიკა, რომ საქმე აქამდე არ მისულიყო.
ბურჯანაძის განცხადებითვე, თუ ეს უუნარობა გაგრძელდება, რა თქმა უნდა, დაპირისპირება კიდევ უფრო გამწვავდება და ქვეყანა ძალიან დიდი საფრთხის წინაშე აღმოჩნდება.
„ამას ვგულისხმობდი, როდესაც ვამბობდი, რომ ყველა ფაქტი უნდა გამოძიებულიყო, მაგრამ მე მგონი ამ ხელისუფლებას უფრო ეშინია 26 მაისის გამოძიების, ვიდრე „ნაციონალურ მოძრაობას“. ეშინია იმიტომ რომ ამ ხელისუფლებაში არავის უნდა ნინო ბურჯანაძის, „სახალხო კრების“ და „დემოკრატიული მოძრაობის“ რეალური სახე დაინახოს საქართველომ და საქართველოს მოსახლეობამ. ჩვენ ამას დიდი ხანია ვითხოვთ, მაგრამ სამწუხაროდ, ბერკეტები ჩვენს ხელში არ არის“ - განაცხადა ნინო ბურჯანაძემ.
