თბილისის მერია დღეს გამართულ აქციასთან დაკავშირებით განცახდებას ავრცელებს, სადაც მითითებულია, რომ მათი უმეტესობა ,,ერთიანი ნაციონალური მოძრაობის” წევრები და მხარდამჭერები იყვნენ.
დედაქალაქის მერია მოუწოდებს დღევანდელი აქციის მონაწილეებს, ნუ იქცევიან პოლიტიკური მანიპულაციის იარაღად და იმოქმედონ კანონის შესაბამისად.
,,დღეს თბილისის მერიასთან იპოთეკარებისა და ე.წ. ატსტუპნიკების სახელით აქცია გაიმართა, რომელზეც აქციის მონაწილეები თბილისის მერიისგან დაზარალებულთა პრობლემების მოგვარებას ითხოვდნენ.აქციის მონაწილეთა უმეტესობას ერთიანი ნაციონალური მოძრაობის წევრები და მხარდამჭერები წარმოადგენდნენ. გამომდინარე აქედან, თბილისის მერია მიიჩნევს, რომ აღნიშნული აქცია, ისევე, როგორც გასულ დღეებში სხვადასხვა მუნიციპალურ შენობებთან გამართული აქციები, პოლიტიკურად მართულია და მიზნად უწყების დეზორგანიზებას ისახავს. რაც შეეხება ზოგადად იპოთეკით დაზარალებულთა საკითხს, „ადგილობრივი თვითმმართველობის კოდექსით“ მუნიციპალიტეტს ამგვარი პრობლემის მოგვარების ბერკეტი არ გააჩნია. თბილისის მერიის წარმომადგენლებმა რამდენჯერმე გამართეს იპოთეკით დაზარალებული მოსახლეობის ნაწილთან შეხვედრა და მათ აღნიშნულის შესახებ განემარტათ.თბილისის მერია მოუწოდებს დღევანდელი აქციის მონაწილეებს, ნუ იქცევიან პოლიტიკური მანიპულაციის იარაღად და იმოქმედონ კანონის შესაბამისად”, _ნათქვამია განცახდებაში.
შეგახსენებთ, რომ რამდენიმე საათის წინ თბილისის მერიასთან საპატრულო და სასწრაფო დახმარების თანამშრომლები იყვნენ მობილიზებულები.
შესაბამისი სამსახურების გამოძახება მას შემდეგ გახდა აუცილებელი რაც იპოთეკით დაზარალებულმა აქციის მონაწილეებმა მერიაში ის შენობაში შესვლა ძალით სცადეს.
მათი განცხადებით ისინი თბილისის მერთან დაგეგმილ შეხვედრაზე მივიდნენ თუმცა მათ დავით ნარმანია არ შეხვდა.
დაპირისპირების დროს დაშავდა აქციის ერთი მონაწილე.
მას გული წაუვიდა რის გამოც ადგილზე სასწრაფო სამედიცინო დახმარების გამოძახება გახდა საჭირო.
