მეორე დღეა საგარეო ურთიერთობათა კომიტეტის წევრები, საგარეო საქმეთა მინისტრის მოადგილეებისგან, მიმართულებების მიხედვით, სამინისტროს საქმიანობის შესახებ ინფორმაციას ისმენენ.
დღეს კანონმდებლების წინაშე მოხსენებით საგარეო საქმეთა მინისტრის მოადგილე, ხათუნა თოთლაძე წარსდგა, რომელმაც აქცენტები იმ მიმართულებებზე გააკეთა, რომელსაც თავად კურირებს. ეს არის კულტურული და ჰუმანიტარული ურთიერთობები და კულტურული დიპლომატია.
მინისტრის მოადგილემ დეპუტატებს სამომავლო გეგმები და ხედვები გააცნო რომელიც სამინისტროს ამ მიმართულებით აქვს.
მომხსენებელმა ასევე, ისაუბრა საერთაშორისო სამართლებრივი დეპარტამენტის და იურიდიულ საკითხთა და პარლამენტთან ურთიერთობის დეპარტამენტის საქმიანობის შესახებ.
„ფორმატი არის ძალიან საინტერესო, სადაც დეპუტატები აქტიურად იყვნენ ჩართულები. ბევრი კითხვა და რეკომენდაცია წამოვიდა მათგან, რომელსაც საქმიანობის პროცესში აუცილებლად გავითვალისწინებთ“, - აღნიშნა ხათუნა თოთლაძემ სხდომის დასრულებისას.
„დღევანდელი დღე დაეთმო საერთაშორისო სამართლებრივ დეპარტამენტს, რომლის ფარგლებშიც საქართველოს უკვე მიმდინარე წლის განმავლობაში დაგეგმილი საერთაშორისო ხელშეკრულებების საკითხები განიხილება. მოვისმინეთ ძალიან საინტერესო მოხსენება ყველა იმ ღონისძიებაზე, რომელიც ტარდება საქართველოს კულტურული მემკვიდრეობის ქვეყნის გარეთ გატანისთვის, კულტურის სამინისტროსთან კოორდინაციით. საგარეო საქმეთა სამინისტრომ მოგვაწოდა ინფორმაცია მიმართულებების მიხედვით თავიანთ როლზე და ჩვენი დიპლომატიური მისიების საქმიანობაზე. შეხვედრაზე ყურადღება გამახვილდა ტალინის კინოფესტივალზე, სადაც მაქსიმალურად მოხდება ქართული კინოს წარმოჩენა; უკვე ჩატარებული და მიმდინარე კინოფესტივალი აშშ-ში და კანადაში, სადაც 1907 წლის შემდეგ გადაღებული პრაქტიკულად ყველა ქართული ფილმის ჩვენება მოხდა და 2018 წლის ფრანკფურტის წიგნის ბაზრობა, სადაც საქართველოს განსაკუთრებული სტატუსი ექნება. ამ ღონისძიებისთვის ქართული წიგნების თარგმანებია უზრუნველსაყოფი იმისთვის, რომ სათანადოდ წარმოჩნდეს ჩვენი ქვეყანა, ხელმისაწვდომი და წაკითხვადი გახდეს ევროპელი საზოგადოებისთვის ქართველი მწერლების რაც შეიძლება ფართო სპექტრი, რაზეც შესაბამისი სამინისტროები აქტიურად მუშაობენ“, - განაცხადა თინა ხიდაშელმა.
შეხვედრა დახურულ კარს მიღმა წარიმართა. როგორც კომიტეტის თავმჯდომარემ, თედო ჯაფარიძემ, სხდომის დასრულების შემდეგ განაცხადა საპარლამენტო მოსმენა საქართველოს საგარეო ურთიერთობების აქტუალური თემების ფართო სპექტრთან დაკავშირებით უკვე მეორე დღეა მიმდინარეობს.
„ჩვენ მოვუსმინეთ საგარეო უწყებას, მოვისმინეთ მათი საქმიანობის შესახებ ინფორმაცია. აღმასრულებელ და საკანონმდებლო ხელისუფლებას შორის თანამშრომლობა ძალზე მნიშვნელოვანია და ასეთი შეხვედრები კვლავაც გაგრძელდება“, - აღნიშნა თედო ჯაფარიძემ.
პარლამენტის საგარეო ურთიერთობათა კომიტეტი საგარეო საქმეთა სამინისტროს წარმომადგენლების მოსმენას მომდევნო კვირასაც განაგრძობს.
დღევანდელ სხდომას კი, საგარეო ურთიერთობათა კომიტეტის თავმჯდომარის მოადგილე ანი მიროტაძე უძღვებოდა.
