პარლამენტის თავმჯდომარე დავით უსუფაშვილი მიიჩნევს, რომ რიგგარეშე სხდომის დანიშვნით პრეზიდენტი გიორგი მარგველაშვილი არავის ანკესს, მათ შორის არც ,,ნაციონალების” ანკესს არ წამოგებია და ის გადაწყვეტილებას დამოუკიდებლად იღებს.
უსუფაშვილის განცხადებით, რაც შეეხება იმას, რომ პრეზიდენტის გადაწყვეტილების გამო უმრავლესობის დეპუტატები განწყენდნენ ,,შეუძლიათ ცივი წყალი დალიონ”
,, ვინც ნაწყენია ცივი წყალი დალიოს, ბევრი მაქვს მაცივარში მობრძანდნენ ყველა მხრიდან. პოლიტიკაში მყოფმა ადამიანებმა უნდა გაიკეთონ აცრა ნაწყენობაზე, გაბრაზებაზე, გაბუტვაზე და ამ ტიპის კატეგორიებზე. ამასობაში ჩვენ ყველამ მოქალაქეებმა, ჟურნალისტებმა უნდა გავიკეთოთ ასევე გარკვეული ტიპის აცრები და პოლიტიკოსებს შორის უთანხმოება, ან საკითზე ვერ შეთანხმება არ წამოვიდგინოთ როგორც აპოკალიფსური მოვლენა. ჩვენ ყოველდღიურად განსახილველი გვაქვს უამრავი საკითხი და გვვალება, უნდა მოვახერხოთ თითოეული საკითხისადმი პასუხისმგებლიანი, საქმიანი დამოკიდებულება. კონკრეტულ საკითხზე უმრავლეოსობის წამომადგენლების მოსაზრება არის განსხვავებული პრეზიდენტის მოსაზრებისგან, ამ განსხვავების აკარგიანობისა და სისწორის შემფასებელი არის საქართველოს მოსახლეობა. არა მგონია, რომ პრეზიდენტი ვინმეს ანკესს წამოეგო, პრეზიდენტი თავისი გადაწყვეტილებებით მოქმედებს. ხანდახან პრეზიდენტიც, პარლამნეტის თავმჯდომარეც სცდება, მთავარობის წევრიც, ოპოზიციაც სცდება, მაგრამ ეს არ ნიშნავს ვინმეს ანკესზე წამოგებას”, _განაცხადა უსუფაშვილმა.
შეგახსენებთ, რომ პრეზიდენტმა პარლამენტის რიგგარეშე სხდომა 13 მარტს 12:00 საათზე დანიშნა.
,,საქართველოს პრეზიდენტის განკარგულებით, საქართველოს კონსტიტუციის 61-ე მუხლის მე-2 პუნქტის შესაბამისად, საქართველოს პარლამენტის რიგგარეშე სხდომა 2015 წლის 13 მარტის 12 საათიდან დაინიშნა. განკარგულების მიხედვით პარლამენტის რიგგარეშე სხდომაზე განსახილველი საკითხია: ეროვნული ვალუტის-ლარის კურსის სტაბილიზაციისკენ მიმართული ღონისძიებები”, _ნათქვამია პრეზიდენტის განკარგულებაში.
