საქართველო-ჩინეთის ახალი ურთიერთობების პერსპექტივებზე ისაუბრეს საქართველოს პარლამენტის უმრავლესობის ლიდერმა, პარლამენტის ჩინეთთან მეგობრობის ჯგუფის ხელმძღვანელმა, დავით საგანელიძემ და ჩინეთის რამოდენიმე უმსხვილესი კომპანიის წარმომადგენლებმა დღევანდელ შეხვედრაზე. დეკემბერში ჩინეთის სახალხო რესპუბლიკაში დავით საგანელიძის ვიზიტისას შედგა შეთანხმება, რომ რამდენიმე მსხვილი კომპანიის წარმომადგენლები ჩამოვიდოდნენ საქართველოში, რათა საქმიანი ურთიერთობა დაამყარონ კონკრეტულ ქართულ კომპანიებთან, რომელთა მიმართაც მათ ინტერესი გამოთქვეს.
თოთხმეტკაციანი ჩინური დელეგაციის შემადგენლობაში არიან წარმომადგენლები ჩინეთის ეკონომიკური განვითარების ცენტრიდან, რომელიც ჩინეთის ეკონომიკური განვითარებისა და ექსპორტის წახალისებაზე მუშაობს. დავით საგანელიძის შეფასებით „ასეთი ურთიერთობა ქართული მხარისთვის მომგებიანი და საინტერესო იქნება, ეს კარგი საშუალებაა ახალი ინვესტიციების შემოსვლისათვის“.
ჩინელი სტუმრები ორი დღის განმავლობაში სხვადასხვა სამინისტროების ხელმძღვანელებს და კონკრეტული კომპანიების წარმომადგენლებს შეხვდებიან.
