პარლამენტის ბიუროს სხდომაზე 4-6 მარტის პლენარული სხდომების დღის წესრიგზე იმსჯელეს.
მომავალი კვირის დღის წესრიგშია წინა სხდომებიდან გადმოყოლილი რამდენიმე კენჭსაყრელი საკითხი. რაც შეეხება განსახილველ საკითხებს, პარლამენტი საბოლოო - მესამე მოსმენით განიხილავს კანონპროექტებს: „საქართველოს ეროვნული საინვესტიციო გარემოს შესახებ“; „ეროვნული უსაფრთხოების პოლიტიკის დაგეგმვისა და კოორდინაციის წესის შესახებ“, თანმდევი კანონპროექტებითურთ; „ საქართველოს დაზვერვის სამსახურის შესახებ“ საქართველოს კანონში ცვლილების შეტანის თაობაზე“. განსახილველ საკითხთა შორისაა პარლამენტის დადგენილების პროექტები „ადამიანის უფლებათა და ძირითად თავისუფლებათა დაცვის კონვენციაში ცვლილების შეტანის შესახებ მე-15 ოქმის“ რატიფიცირების თაობაზე“, „ადამიანის უფლებათა და ძირითად თავისუფლებათა დაცვის კონვენციის მე-16 ოქმი“, „საქართველოს მთავრობასა და ნორვეგიის სამეფოს მთავრობას შორის საიდუმლო ინფორმაციის გაცვლისა და ორმხრივად დაცვის შესახებ“ შეთანხმების რატიფიცირების თაობაზე“.
მიმდინარე სასესიო კვირას, უმაღლესი საკანონმდებლო ორგანოს წევრები პლენარულ სხდომაზე „პატიმრობის კოდექსში ცვლილების შეტანის შესახებ“ კანონპროექტის და მისი თანმდევი კანონპროექტების პაკეტის პირველი მოსმენით განხილვას იწყებენ. ამ კანონპროექტით სასჯელაღსრულებისა და პრობაციის სამინისტროს სისტემის გარდაქმნა და მისი სტრუქტურის ახლებურად ჩამოყალიბება ხდება.
ბიუროს წევრებმა ახალ საკანონმდებლო ინიციატივებზეც იმსჯელეს და მათ განსახილველად წამყვანი და სავალდებულო კომიტეტები განსაზღვრეს. გადაწყვეტილება 70-მდე საკანონმდებლო ინიციატივაზე იქნა მიღებული.
დასასრულ, ბიურომ საორგანიზაციო საკითხებიც განიხილა. მათ შორის საკითხი ეხება ორი კომიტეტის თავმჯდომარის ვაკანსიაზე კანდიდატურების წარდგენას. დიასპორისა და კავკასიის საკითხთა კომიტეტის თავმჯდომარის ვაკანტურ თანამდებობაზე ასარჩევად ფრაქციამ „ქართული ოცნება“ წარადგინა თეიმურაზ ჭკუასელის, ხოლო ფრაქციამ „ქართული ოცნება - ეროვნული ფორუმი“ - შალვა კიკნაველიძის კანდიდატურები. საფინანსო-საბიუჯეტო კომიტეტის თავმჯდომარის თანამდებობაზე კი ფრაქციამ „ქართული ოცნება“ თამაზ მეჭიაურის კანდიდატურა წარადგინა.
ბიურომ ასევე დაამტკიცა ხაზინადართა საბჭოს გადაწყვეტილებები.
ბიუროს გადაწყვეტილებით, პარლამენტის პლენარული სხდომა 4 მარტს, 14:00 საათზე გაიმართება.
