,,თავისუფალი დემოკრატების" ერთ-ერთი ლიდერი ნინო გოგუაძე ,,ჯი-ეიჩ-ენთან" საუბარში პარტიის ხელმძღვანელის ირაკლი ალასანიას, ,,ნაცმოძრაობის" საპარლამენტო ლიდერის დავით ბაქრაძისა და საზოგადოებრივი ორგანიზაცია "ივერია"-ს ერთ-ერთი დამფუძნებლის ნიკა რურუას მიერ კოალიციის შესაძლო ჩამოყალიბების შესახებ ინფორმაციას მიზანმიმართულად გავრცელებულ ჭორს უწოდებს, რომელიც ,,თავისუფალი დემოკრატების" დისკრედიტაციას ემსახურება.
,, ეს არის მიზანმიმართული ჭორები, რომელიც შიგადაშიგ გამოჟონავს ხოლმე ასე ვთქვათ ჭორების მანქანის საშუალებით, რათა მოახდინონ ,,თავისუფალი დემოკრატების" დისკრედიტაცია. ჯერ მოინდომეს, რომ ირაკლი ალასანია კორუფციაში ,,ემხილებინათ". რაც ხელისუფლებაში მოვედით იქიდან მოყოლებული ჭორი, რომ ,,თავისუფალი დემოკრატები" ,,ნაციონალებთან" ერთად ვაპირებთ კოალიციის შექმნას სულ ჰაერში ტრიალებს, რაც მიზანმიმართული ჭორია", _აცხადებს გოგუაძე.
მისივე განცხადებით, პარტიაში არც კი განიხილება ახალი კოალიციის შექმნის საკითხი.
,, მინდა გითხრათ, რომ ჩვენ შეურიგებლად ვიბრძოლებთ ყველა პრორუსულ ძალასთან, ასევე იმ ძალასთან რომელმაც დასავლური ღირებულებებისა და დემოკრატიის სახელით, ბევრი არადემოკრატიული და სასტიკი ქმედება ჩაიდინა. ამიტომ მათთან ერთად კოალიციის შექმნა გამორიცხულია. ჩვენი პოლიტიკური ძალა ,,თავისუფალი დემოკრატები" არც კი განიხილავს კოალიციის შექმნის საკითხს", _განაცხადა ,,ჯი-ეიჩ-ენთან" საუბარში გოგუაძემ.
შეგახსენებთ, რომ ბოლო პერიოდის განმავლობაში ვრცელდება ინფორმაცია ირაკლი ალასანიას, ნიკა რურუასა და დავით ბაქრაძის მიერ ახალ კოალიციის შექმნის შესახებ.
