არასამთავრობო ორგანზაციები ეთიკის კოდექსზე მუშაობას იწყებენ. როგორც არასამთვრობო სექტორის წევრები აცხადებენ, ყოფილი პრემიერის ბიძინა ივანიშვილის მიერ მათი მისამართით გაკეთებული განცხადებები არასამთავრობო ორგანიზაციების დისკრეტიტაციას ისახავდა მიზნად.
"მას რომ ეთქვა, რომ ის სწავლობდა ორგანიზაციების საქმიანობას და საუბრისას გაებათილებინა ჩვენს მიერ შემუშავებული და უკვე დადებული დასკვნები ეს იქნებოდა კრიტიკა. მან რაც გააკეთა ეს პირდაპირი ზეოლაა არასამთავრობო სექტორზე,"- განაცხადა ,,საერთაშორისო გამჭვირვალობა საქართველოს" ხელმძღვანელმა ეკა გიგაურმა.
ყოფილი პრემიერის ბიძინა ივანიშვილის განცხადებით, იგი არასამთავრობო ორგანიზაციებზე კვლევის ჩატარებას გეგმავს, რადგან ამ მიმართულებით ბევრი კითხვა არსებობს.
,,არასამთავრობოებზე ცალკე კვლევას ვაკეთებთ, მთავრობაზე დიდი არასამთავრობოები რომ არიან, მათზე, უფრო სწორად პიროვნებებზე - ლომჯარიაზე, გიგაურზე, კოჟორიძეზე. ჩვენ საინტერესო კვლევას დავდებთ მათზე. ძალიან ბევრი კითხვა გვაქვს. თვითონ მათზე გვაქვს კითხვები, რამდენადაც ტაბუ დაადეს რაღაც საკითხებს - არასამთავრობოებს ვერ შეეხებოდით, ასევე ცდილობდნენ, რომ პრეზიდენტის ინსტიტუტი არ გაგვეკრიტიკებინა", - განაცხადა ივანიშვილმა.