პოლიტოლოგი რამაზ საყვარელიძე ,,ჯი-ეიჩ-ენთან" საუბარში ნეგატიურად აფასებს საქართველოს ხელისუფლების მხრიდან რუსეთთან სავაჭრო დიალოგის შეჩერების გადაწყვეტილებას და აღნიშნავს, რომ სახელმწიფოები ღია ომის პირობებშიც კი ინარჩუნებენ ეკონომიკურ ურთიერთობებს.
,, ქართულ პროდუქციაზე ემბარგოს დადების შანსი ყოველთვის იყო და ამაზე მუდმივად საუბრობდნენ. ეს ხელისუფლება წავიდა სწორედ იმ პოზიციაზე თუ რუსეთი დაადებდა, ემბარგოს კარგი არ იქნებოდა, თუ არადა სხვა შემთხვევაAი მომგებიანი იქნებოდა რუსეთის ბაზარი. Aახლა იმავე მოტივით რუსეთთან ვაჭრობაზე უარის თქმა ცოტა გაუგებარია. ღია ომის პირობებშიც კი არ წყდება ქვეყნებს შორის ვაჭრობა. მაგალითისთვის რუსეთ-უკრაინის ომია და მიუხედავად ამისა ეკონომიკური ურთიერთობები არ შეწყვეტილა. Mშესაბამისად ვერ ვხედავ გამართლებას რუსეთთან სავაჭრო ურთიერთობის შეწყვეტის და ვერც ახალი ტიპის ურთიერთობის ჩამოყალიბების", -განაცხადა ,,ჯი-ეიჩ-ენთან" საუბარში საყვარელიძემ.
საქართველოს საგარეო საქმეთა მინისტრის, თამარ ბერუჩაშვილის განცხადებით, საქართველოს ხელისუფლება „მახედ" მიიჩნევს რუსეთის ბაზარს. ბერუჩაშვილმა ამის შესახებ, ვაშინგტონში რადიო ,,თავისუფლების" კორესპონდენტთან საუბრისას განაცხადა.
„ახლა დროებითვაჩერებთ რუსეთთან ვაჭრობის საკითხებზე ამ დიალოგს, მას აზრი არა აქვს. რუსეთს ნებისმიერ მომენტში შეუძლია, ისევ აამოქმედოს ემბარგო", _განაცხადა ბერუჩაშვილმა რადიო ,,თავისუფლების" კორესპონდენტთან საუბრისას.
ბერუჩაშვილის სიტყვებით, რუსეთი მნიშვნელოვან პოლიტიკურ საკითხებთან დაკავშირებითაც „განაგრძობს დესტრუქციულ ნაბიჯებს, რის უკანასკნელი ნათელყოფა იყო ნოემბერში მოსკოვში ე.წ. სტრატეგიული პარტნიორობისა და ინტეგრაციის შესახებ შეთანხმების ხელმოწერა სოხუმის საოკუპაციო რეჟიმთან".
